tb - CHÉS TCHUINS D’ZIU D’ÉCH BAROUMOAITE - bt
archives du premier semestre 2008

[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/01/08

LETTE À CH’PÉRE NOÉ

Conme os l’savez sûremint, échl’interprindeux qu’il o sin dépotoér in face d’ém moaison i vient d’és foaire hanser in.ne bâtisse pour li y foaire ses burieux. Él carpinte al est finite, pi durant des smain.nes j’ai té rinveillé à l’pointelette pèr chés cœups d’mèrtieux d’chés carpintiers. Ch’est conme cho qu’tous les jours au matin éj m’ai écanillé avuc in.ne tchote pinsée pour chu chvaïer de La Barre. Jé m’disoait qu’li étou il avoait té rinveillé pèr des carpintiers, mais li sin mèrtyre à ch’paure lapide i n’avoait duré qu’in.ne jornée !…

Min cher pére Noé, os allez pétête vous dire qu’éj sus t-in route à passer pèr Boves, mais quoé qu’os voulez, i feut tout d’minme bien qu’j’asplique. A foait qu’éch bâtimint in tchestion il est lò jusse pa dvant mes ferniêtes et pi qu’i m’impêque éd vir Djimicourt et pi surtoute chés camps. Des camps qu’j’étoais duit à vir tout au long d’l’énnée, qu’i cangeoai'te éd couleurs suivants chés saisons, pi qu’jé n’décessoais point d’radmirer : quanq chés soéles o bin chés pamelles il leu coutchoai'té in nsous ch’vint, qu’os éroait dit la mer, quanq chés terres rabourées i miloai'te au solé d’aprés-eut, ou bin coére quanq i feumoai'te din chés matins un molé pu froéds d’novimbe.

Bé tout cho ch’est tchuit, ratatchuit, éj m’értrouve avuc un mur pi un toét dvant min nez. Déjò qu’a n’étoait point d’trop racachant d’vir éch dépotoér imporvigné d’fien d’tous les sortes ; in.ne béton.niére, dz’échafaudages, des bouts d’tuyeux in plastique noér o bin rouge, des monts de bastaings à l’berdandouille, bé lò i né m’restero pu qu’cho à raviser !

Vlò don l’pourquoé d’min mot d’billet. Os avez pu rmèrtcher qu’cho foait un rudemint boin momint qu’j’ai n’vous ai point téné pour in.ne raveluque ou in.ne eute. Alorss lò, os pourroète ém foaire in.ne tchote faveur, minme siq j’ai un tchot molé passé l’âge. Éj sais bien étou qu’jé n’sus point granmint in avanche, mais tâchez d’foaire un effort, éj croés bien qu’jé n’pourroais point attinde in.ne énnée intiére. Vlò ch’qu’i m’froait jolimint plaisi : os pourroète-ti, à mesure, glicher din mn écminée un lanche-rotchette avuc tchéques munitions ?


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/01/08

ÉJ SUS T-UN AMPHARISTÉRE

Os l’savez pétête édjò, éj sus t-un matché d’diction.naires. D’él feute à tchéche, bé d’él feute à min pére ! Li qu’i n’avoait qu’sin certificat, sitôt qu’il o yeu quate sous il o acaté un diction.naire Larousse, in deux tonmes s’i vous plait. In déhiors d’éch jornal éj né l’ai quasimint janmoais vu lire eute cose éq sin Larousse.

Ah sié, jé m’ramintuve un cœup, il étoait in route à lire in.ne tchote histoére qu’a s’appeloait des coéchons, ch’est des coéchons ! Cho s’passoait à La Poste, un imploéyé titisse-tatasse i vouloait taxer un cawite conme siq ch’éroait té ch’coéchon à Saint Antoéne. Pi conme person.ne éne vouloait poéyer, la Poste al finichoait pèr t-ête imporvignée d’cawites. Ch’est qu’a s’érproduit pu vite éq des lapins chés bétails-lò. À lire cho, min pére i nin braiyoait d’rire !…

Pour nin révnir à ch’fanmeux diction.naire, il est achteure à no moaison, éch couvert in tchuir il o viusi, il est fin répilleux, il o minme té radiablé avuc d’él fichelle, pèr min pére, bié seur ! Ch’est qu’il l’ainmoait sin diction.naire. Combien d’foés qu’j’ai pu l’értrouvoér avuc sin nez lanché ndin. À mesure, o nin rioème insen.ne, éj li disoais « Mais, a n’est mie possibe, t’es t-in route à ll’apprinde pèr tchœur ! » Pi li i m’roboloait, tout in risotant din ses bèrbes, « Bé, tu voés, jé n’sais point coére toute ! »

Mi, min frére et pi m’sœur, os ons dû attinde éd t-ête bien édrué dvant d’avoér él droét d’aller rbéyer ndin. Et pi coére, i falloait montrer qu’o z-avoait ses mains propes, i falloait étou s’assir in forme éd gin à l’tabe éd no salle à minger. Lò seulemint, o pouvoait ouvrir éch live saint. Pasqu’est vrai qu’pour li conme pour nous ch’étoait miux qu’él bibe.

In.nhui, quanq éj rouve in.ne page, des foés éj déteupe in.ne tchote fleur qu’al o sétchie lò, in.ne violette à mesure. Cho m’foait tout drôle, ch’est un molé d’li qu’jé rtrouve-lò.

Quanq i m’voéyoait planter un cleu d’ém main gueuche – jé n’pouvoais mie foaire eutrémint, j’étoais gueucher pi jé l’sus coére – i n’ém traitoait point d’padole, ni d’malapatte. Nan, bié seur éq nan ! Li qu’i n’foaisoait point d’imblée, a n’li sroait point vnu à l’idée nan pu d’ém dire éq j’étoais ampharistére ! Minme siq i con.naissoait ch’mot-lò, qu’il étoait din sin diction.naire, i ll’értraduisoait in picard : pour li, j’ai tours té gueucher des deux mains !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/02/08

TCHÉCHE QU’IL IRO LI DIRE QUÉ L’CAMPAINGNE AL EST FINITE ?

Vlò don biétôt neuf moés qu’os ons un nouvieu présidint. Chtichi qu’il étoait lò dvant li, o llé savoait bien qu’ch’étoait un minteu d’premiére, mais avuc éch nouvieu ch’étoait pu l’minme, o z-alloait vir ch’qu’o z-alloait vir, vu qu’avuc li toute il évnoait possibe !

Bin achteure os pouvez vir : il avoait promis qu’échl’acatoér i sroait coére é-miux qu’édvant. Qu’o z-alloait rattraper chu rtèrd. Éq cho passeroait dvant tout l’resse, tellemint qu’étoait pressant. Conme d’effet, i s’a raugminté éd deux chints six pour chint. Pi pèr aprés, bin os rpasserez, chés tchaisses i sont vides ! Éj croés bien minme qu’i ll’étoai'te djò dvant. Pour li, est asseuré qu’échl’acatoér i vo fin bien. Os savez-ti combien qu’i gaingne pèr moés in.nhui no paure présidint ? 49.191,02 € !

Pour qu’ész eutes il euche'té droét à in.ne tchote flépe in puss à chés fins d’moés, i feuro attinde qu’y euche un molé d’pécaillons din chés tchaisses… pi d’où qu’i s’in vo aller szés tcheur, chés pécaillons ? bé cho sro din m’fouillousse pi din l’vôte. Point tchestion qu’a fuche din l’poque à Bolloré. Sins cho, cmint qu’i pèrtiroait in vagances, no présidint ?

Quanq o sait qu’l’interprinze Bolloré al passe des mèrtchés du diabe avu ch’gouvernémint, cho m’foait rapinser à chl’écononme éd lycée qu’i m’disoait i n-y o tchéques énnées d’cho :
« siq un écononme i t’dit qu’i poéye és viande, ch’est pétête un niacoés, mais ch’est pu sûremint un minteu ! »
Bé lò ch’est du drop pèrel à l’doublure, un service i nin veut un eute.

Pi quoé qu’ch’est qu’i n’o point té dire à ch’pape, qu’un marister i n’veudroait janmoais un tchuré pour apprinde chés boin.nes min.niéres à chés ptchots ? Ch’est-ti qu’os sroème érnu du temps d’chés roés ? Nicolas 1er i n’o pourtant point té sacré à Reims. Mais il o té nonmé chamoéne pèr Benoét XVI. Au moéyin-âge, o pouvoait t-ête mèrié pi chamoéne, mais à mn idée, ch’est li ch’preume à t-ête divorché pi chamoéne.

In ramindo, il avoait inmné là-bos, din ses valises, éch puss boin éd nos comiques-proutiers, un contchubitant d’premiére. Giscard, pour t-ête pu prés du peupe, i nous o jué du corbillon, Nicolas, li, i jue au Bigard !

À l’fin des fins, tout ch’qu’i foait ch’n’est qu’du théïâte, pi point du boin. I magine pétête éq durant qu’chés gins i llé rbé'té s’espadron.ner, i n’pinse'té point à leu porté-mon.noaie  ? un porté-mon.noaie qu’i ratinche un molé d’puss fil à mesure éq chés jours i passe'te ?

À vir chés sondages, j’ai idée qu’i n-y in o des qu’il ont voté pour li, pi qu’i leus in morde'té leus doégts. Mais quoé qu’os voulez, i n’est pu temps d’mette és main à sin tchul quanq éch pet berneu il est sorti !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/02/08

CH’EST À L’ADON !

Ch’est à l’adon qu’éj sus in plein.ne décarsure qu’il o follu hier qu’éj voéche Adville pour échl’Assimblée Générale d’éch Lanchron. J’avoais m’tête conme un poturon ; un poturon avuc des malots qu’i leu proméne'té ndin. Jé n’sus point resté in.ne heure. Jusse él temps d’aperchuvoér éch tchot Florian, éq ch’est li ch’pu jon.ne éd chés lancheron.neux. Point tchestion d’li foaire un tchot bé. J’alloais tout d’minme point li rpasser mes microbes. D’autant qu’i sont granmint d’durmort. I résist'te à toute : éch flipe, chés grogs au rhum pi ch’Chivas 12 ans d’âge.

Éj sus don rintré aïte aïte à no moaison érprinde min traitemint et pi m’lancher din ch’fin fond d’min lit. L’air a n’m’avoait point d’trop foait d’bien, j’étoais maflé. Jé m’sus t-indordelé in moins d’deux pour ém rinveiller au mitan d’él nuit avuc din l’idée d’avoér oblié tchéque cose, mais wate ! allez savoér quoé ? Éj m’ai raniché in m’disant qué dmain i froait jour pi qu’i sroait bien temps d’y pinser…

Nous y vlò in.nhui, pi conme d’effet, i foait jour. Ch’est ch’contraire qu’il éroait té ton.nant ! Et pi achteure jé l’sais ch’qué j’ai oblié hier : ch’est qu’hier os étoait l’seize, pi qu’tous les seize du moés, éch baroumoaite i foait sin tchuin d’ziu ! Acré vain dju ! Bé nin vlò d’in.ne eute !

Ch’est l’feute à tous chés meudits médicamints ; mèrchez, o n’sait point toute édsu chés effets ésgondaires. Pour mi, tout cho a m’o foait perde él mémoére. I feuro qu’jé m’déméfie ! Déjò qu’éj sais qu’éch Chivas i m’don.ne des crises éd goutte !

Jé nn ai yeu bien des cœups à n’point savoér quoé dire, à m’foaire du sang in m’édmandant éd quoé qu’j’alloais bien pouvoér édviser, édsur quoé digon.ner pi dsur tchéche langarder !

Mais achteure, i n’y o pu d’dinger, avuc no présidint saint-bling-bling ch’est tous les jours qu’i n-y o à dire. Tnez, d’eximpe, chés éfants juifs à foaire prinde in quèrque pèr chés ptchots éd chés écoles primaires. Tout l’mon.ne il est conte. Vlò coére qu’éj nin rajoute ! Ch’est pu fort éq mi, quoé qu’os voulez ! Non ! tout l’mon.ne i n’est point conte, à preufe él paure Pécresse, bien tchul-bénite, bien bruche à terluire ! pi ch’est qu’al sait éd quoé qu’al cause, i n’est qu’éd vir sin parcours. Ch’est in.ne éspécialisse éd chés tchestions d’éfants… Attindez, éj croés qu’jé m’berlure, al est sortie d’l’E.N.A. diplonmée in administration. Mais ch’est-ti point du minme pèrel ? Boin à rien pi capabe éd toute !

Bon, éd tous sins, tout cho os pouvez llé lire din vos jornals… siq os lisez chés boins, d’jornals ! alorss laissez-mé rtorner à min flipe, éj m’in rvos foaire in.ne neuvain.ne éd tchinze jours… au moinss !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/03/08

ADÉ CH’FAKIR, BIENVNUE DANY !

Fakir a n’est point granmint picard, pi ch’n’est point in mettant un ch’ pa dvant qu’cho lé dvaro ! Et pi d’tous sins , i m’sen.ne bien qu’din ch’jornal-lò, n’y o janmoais yeu un mot d’picard ! Mais pétête éq jé m’berlure ?

Chés viux conme mi il ont con.nu étou ch’Lafleur, ch’étoait din les énnées soéxante-dix. Conme Fakir, il alloai'té droét à ch’dizieu, pi conme d’effet, il ont vite yeu in.ne poaire éd procés à leu tchul. A foait qu’il ont freumé boutique pi qu’il l’ont té rtrouvoér tous leus copains qu’il étoai'te à foaire du fromage éd bique din chés Cévennes.

Ch’Fakir il éro tnu un molé pu longtemps qué Ch’Lafleur, minme granmint d’puss. Pasqué, quanq o z-y pinse, huit énnées, ch’n’est point rien ! Il éroait tnu coére deux ans, il éroait té aussi viu qu’min tchuin d’ziu, nom d’un ntchien !

Tout du long d’ésn existence, ch’Fakir i n’o point décessé éd taper éd droéte, éd gueuche, pi minme d’estrême-droéte pi d’estrême-gueuche. Person.ne éne li écapoait. Tout l’mon.ne il y avoait droét !

Pi d’un seul cœup d’un seul, vlò qu’o z-apprind qu’éch Fakir, ch’est fini. Qué ll’étchipe a nn o d’assez, éq ch’est d’pèr trop ténant éd taper toudi dsu chés minmes cleus. Éq pétête i rvaront, éq pétête os sz’érvoérons pu, éq ch’est à l’adon  !

Mi, min ptchot doégt i m’o dit qu’éch Fakir il est in route à moérir d’él minme décarsure qu’éch Lafleur. Siq ch’est point du pèrel au minme, cho nn’est point d’loin.

Éll égville ouvriére d’éch Fakir ch’est in.ne gin qu’os con.naissez pétête, un dénonmé Ruffin, Chouo éd sin tchot nom. Chouo Ruffin ch’est un jornalisse qu’il assaye éd foaire sin métier et pi qu’il o sorti un live i n’y o point bien longtemps. Un live qu’i n’o point plé à tout l’mon.ne, bié seur. Un live qu’i s’appéle Quartier Nord pi qu’il o mné sn auteur édvant chés tribunals.

Siq y avoait qu’éch tribunal, éll étchipe d’éch Fakir il y sont duits , mais lò chés juges qu’i leus otchupe'té d’li, il ont des min.niéres pu rapides ! espéditives, conme o dit ! définitives qu’o pourroait dire ! Bref, siq o tnez à vo pieu, i veut miux vous foaire tout ptchot in face éd chés houstabas-lò !

Alorss, adé ch’Fakir, et pi, vu qu’il est à la mode, bienvnue à Dany Boon – un surpitchet bien d’éch Nord, n’est point ? – éq ch’est un brave fiu qu’j’ainme bien, pi qu’i n froait point d’mau à in.ne mouque. Mais siq os voulez mn avis, mi j’don.neroais bien un chint d’Dany conte él mitan d’un Fakir.


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/03/08

VA KERE EUNE BIERE !

Jé n’mé sins pu picher édpu qu’éj sais qu’éj foais pèrtie éd chés famieux Picards ! Pi surtoute édpu qu’jé apprins qu’os ons no Dany Boon à nous, minme éq ch’est Chitcatt, euch’comik ed Picardie !

Siq os n’comprindez point grand cose à mes ratrouilleries, ch’est qu’j’ai déteupé i n-y o in.ne cope éd jours, édsu ch’site à Sonme-tourisme in.ne page qu’a n’étoait point ordinaire. Ch’étoait mitan français mitan picard truté et pi ch’est lò qu’j’ai apprins qu’os avoème Chitcatt, no Dany Boon à nous ! Jé m’sus point déméfié, j’éroais dû foaire in.ne copie d’él page-lò, vu qu’in.nhui o n’él l-értrouve pu neune pèrt. I nin resse point grand cose, un tchot molé tout d’minme, allez vir là-bos. Jé n’sais point d’trop ch’qu’i s’a passé, pétête qu’i n-y o des gins qu’i leus ont écrit pour leu dire qu’éch picard, él langue picarde, ch’étoait point tout à foait cho. Tout d’minme, n-y o coére  :

chés famieux Picards !
Eune semain’ din ch’gardin, eune semain’ din ch’cour !
Chés mèrtché à rédries i rkminche !

Tant qu’à Chitcatt, euch’comik ed Picardie, siq qu’os avez l’occasion dé ll’intinde (dsu l’page, éch liage i n’vo point) os voérez qu’i n’dit point un seul mot d’picard ! Infin, tout cho pour dire éq pour éch qu’i nn est d’éch récouage, chés bêtes éd Sonme du tourisme i n’sont point chés darins !

In attendir, éch flim à Dany ch’est in.ne rude réclame pour nous eutes picards ! Édsu site éd chés Diseux, lò qu’os êtes achteure, in moins d’chonq jours, ch’o té quasimint chinquante du chint d’visites in puss. Et pi siq os rbéyez à cœuse éq chés gins i leu rtrouve'te à no moaison, os déteupez des dman.nes putôt tchurieuses ! Éj sais-ti, mi ! d’eximpe o voét :

« télécharger vidéo va kere eune biere ».

Pourtant, siq o trachez chti dsu Gogole éj pux vous dire éq chés Diseux i n’sont minme point din chés deux chints premiers ! Éj n’ai point té pu loin, adon, siq i sont tchéque pèrt, ch’est din ch’miyon d’adréches qu’i rest'te !… À mn idée, siq os ons sitant d’mon.ne à mon d’chés Diseux, ch’est rapport à Dziré, vu qu’i pèrle éd chés Diseux dsu sin site (pur jus) – pi qu’i feut qu’éj li diche un grand merci. Conme al disoait m’grand-mére Émérentienne, l’jour qu’al avoait yeu granmint d’visites pi qu’au soér, sin lévier il étoait badjé éd tasses à café sales :

« Os ons coére bien vindu in.nhui ! »

Pi soin ! d’min côté, éj sus bien décidié à nin profiter étou, éj m’as vinde édsu rBay él boutelle vide éd biére du chti qu’j’ai lapée durant qu’j’érbéyoais l’binde-annonche d’éch flim à Dany. Jé ll’ai signée pi déducassée, et pi conme cho j’ai l’idée qu’éj vo vnir célébe, coére pu célébe, à mesure, qu’euch’comik ed Picardie !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/04/08


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/04/08

PAURE MARISTER…

Da nou vallée d’selle Patois picard Bergues Picardie
18 euro + 3,50 euro de port

Vlò ch’qu’o pouvoait déteuper él l-ésmain.ne passée dsu un célébe site intèrnéte éd vintes au rintchér. J’ai l’évint qu’no paure marister éd Creuse il o dû s’értorner din sin luiset !

Il avoait un taïon qu’i s’appeloait Pierre conme li, qu’il étoait ieutenant d’Prouzel, né natif éd Prouzel in seize-chint-chinquante. Édpu ch’temps-lò, i n’y o qu’à l’djerre éd quatore qu’él famille Dutchet al o tchitté l’vallée d’Selle. Ch’est conme cho qu’Pierre, à tchéques jours éd l’armistice, il avoait vnu au mon.ne à Nantes adoù qu’és mére à s’avoait mis au rados d’chés Prussiens. Gainsbourg

À tant qu’marister, il étoait con.nu din ch’mon.ne intier, pi il avoait granmint varon.né. À cœuse éd chés idées qu’il avoait éd foaire apprinde chés éfants tout in foaisant des dessins ou coére édz éstchultures. Il avoait minme invintion.né un mot sprés pour chés dessins qu’i foaisoait, pi qu’i foaisoait foaire à chés éfants avuc d’él colle et pi du sabe éd fonderie, chés fanmeuses silligraphies !

Tout cho pour dire qu’il avoait granmint d’gingin. Il o minme té raconter ses invintions à chés Canadiens ! Et pi jé n’pèrle point éd chés lives dessatchés à Buenos Aires ou eute pèrt… Conme o dit, ch’étoait tchéqu’un !

Pour éch qu’i nn est d’ses écrivures in picard, i y o tchéque cose éd certain, ch’est qu’i n’o point dérogé, quasimint toute i s’passe din l’vallée d’Selle, din un tchot tchuin d’él vallée d’Selle : Plachy-Heut, Plachy-Bos, Tchou-Plachy, Fossemanant, Prouzel bié seur, et pi coére… Pi pou l’resse ch’est à Creuse qu’o l’értrouve, adoù qu’il o té in poste pétête bien s’vie durant d’marister. Os n’démucherez point in.ne seule foés Bergues din tout sn ouvrage !

Tchestion d’picard, ch’étoait un pignu, i trachoait pi i ratatrachoait pour dessatcher ch’mot qu’i falloait à l’plache qu’i falloait. I foaisoait granmint intintion à chés sonorités – « éch picard i feut qu’i cante » conme i llé disoait si bien ! Jé n’pinse point qu’il éroait té granmint contint d’és vir récoué pèr chés vindeux d’nunuteries, ahotché à l’bastchéne éd chés chtis.

Tant qu’à ch’prix, échti qu’i vourroait acater ch’live-lò i n’froait point in.ne boin.ne rétcheusse : os l’trouvarez neu pi pour él minme prix à mon ch’Lanchron, pi surtoute, os srez asseuré dé ll’érchuvoér !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/05/08

CHEZ DU GAZ !

Éj croés bien qu’lò ch’est ch’darin cœup qu’éj m’as pouvoér nin profiter. Él gran.ne ébondie qu’os ons foait tertous insen.ne avuc bienvenue chez les chtis al est in route à s’in ratorner in ieu d’boudin !

Din no poéyis, o n’ons point d’mot pour tsunami ni minme pour raz-d’mèrée, mais quanq él mer al érdeschind, tout jusse aprés chés gran.nes mèrées, i reste édsu chu sabe, des monts éd ratrouilleries qu’il ont té lanchées lò pèr chu flot.

I nn’est qu’éd tracher chti édsu Gogole, et pi os vous aperchuvrez qu’chés boueux i sont à joc édpu in.ne cope éd jours. Chés brasseux d’biére il leus ont rinveillé. Des vindeux d’maillots il ont raverdi : quoé qu’ch’est qu’tu vux d’écrit dsu tin maillot ? 100% chti ou bin biloute ?

Adon, in avant pour chu chtirock, chu ch’ti vélo, chu chti’libre, chu Ch’ti Bonhomme, chu chtirandos, chu ch’ti bouton, chu Ch’ti Blog, chu chti-team, chu chtiludo, chu chtivie, chu chti-aquarium, chu chti comtois (restaurant), chu Chti Annuaire, et pi coére le téléphone pleure en ch’ti, éch campinge le Ch’ti Franoi (in Ardèche), Ch’tribu. Et pi et pi… I n-y in o conme cho 1.620.000 pages, sans compter quanq o n’s’értrouve point à chu casino d’Las Vegas !…

 ! Biloute ! Monte l’Son ! Hein !

— Combien qu’cha pèse un pet ?
— cha n’pèse rin, chez du gaz !!!
— Oh !!! Bin j’cro qu’jai quier dins m’maron.ne…

"oui tro for moi g d racine du nor et en ce momen ma famille et la alor g apri a parlé le chti c tro mortel et vo blagu son tro genial …"

Et pi l’pastorelle :

chti la qui pisse !

Éj m’édmande écmint qu’i foai'te mes boins anmis d’éch Nord, chetlò qu’i n’ont point attindu Dany Boon pour leu dviser din leu pèrlage, éq ch’est in.ne vraie langue, éq ch’est in.ne vèriure éd no picard, avuc ses mots à li et pi ses tornures à li, toute sauf du français truté ! qué misére !…


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/05/08

DIN QUÉ MON.NE QU’OS VIVONS !

Cho foaisoait pu d’in.ne ésmain.ne qu’éj m’édmandoais ch’qu’i m’arrivoait. Éj foaisoais des drôles éd bruit avuc ém bouque. Des vroum quanq éj m’in alloais, des kriss quanq qu’éj m’arrêtoais, des tutute quanq i n-y avoait tchéqu’un dsu min cmin. Rien à foaire, ch’étoait pu fort éq mi !

Pi dpu in.ne cope éd jours, j’ai yeu l’idée qu’cho s’accéléroait. Point moéyin d’freiner, ch’étoait in.ne éspéce d’imbèrdée, in.ne glaillade qu’a n’in finichoait point. N’y o troés jours, à la brune, éj m’ai aperchu qu’mes genoux il évnoai'té tout milant pi qu’à heuteur éd mes fesses, n-y avoait étou deux taques rouges qu’i cminchoai'te à terluire.

J’ém ramintuve, ch’est justémint ch’soér-lò qu’ém fenme al m’o dit :
« Tu n’trouves point qu’él boutelle d’heule-lò al o un flair ? Éj m’in vos llé jter !
— Tu n’y pinses point i nin reste pu d’él mitan ! Tu sais bien qu’à l’heure qu’os vivons, pi à ch’prix qu’il est ch’bèri d’pétrole, i n’feut pu d’gadrouillage. Ch’est l’avenir éd no planéte qu’al est in ju. Nan, j’m’in vos l’mette din ch’réservoér éd no voéture, ch’est un moteur Diésel, il est foait pour ! »

Fut dit fut foait. Et pi, éj n’arrêtoais point éd vroumer quanq éj démarroais, éd krisser quanq éj freinoais, éj tututoais din chés imbouteillages, mes tcheutes i leu mettoai'te à glignoter din chés virages. À l’fin des fins, éj m’ai dit… nan, feut t-ête hon.nête, ch’est m’fenme qu’al m’o dit qu’i falloait qu’éj voéche mon ch’métecin.

I n’feut janmoais contrarier chés fenmes, surtoute él sien.ne. J’ai don prins m’voéture – qu’al mèrche achteure à l’heule à salade – et pi j’sus deschindu Anmiens vir éch cérusien. Il habite din ch wèrtier d’Marolles, in.ne rue in sins unique qu’al est tours plein.ne à cratcher. Un miraque, i n-y avoait in.ne plache jusse édvant s’moaison. Pi coére é-miux, n-y avoait un abe qu’i foaisoait d’l’ombe édsu ch’capot.

M’vlò don in pil-corps din ch’cabinet d’éch métecin. Il écminche à m’austchulter, pi i m’dit :
« Cho torné point rond, j’intinds tchéque cose qu’i clincaille, j’nin sus seur. I feuro foaire dz eutes examens, mais j’mé dmande siq os n’éroète point in.ne biélédcoulée. Éj min vos vous invoéyer pour foaire in.ne espertise mon d’un éspécialisse. »

Cho nn est bien d’chés gins instruction.nés, i n’arrêt'té point d’foaire éd l’imblée avuc des mots qu’o n’con.noaît point ! Vlò qu’j’avoais in.ne attaque éd biélédcoulée. Coére in.ne nouvelle maladie, probabe !

Quanq j’ai voulu rprinde ém voéture, éj n’ai point comprins ch’qu’i s’avoait passé, ém voéture al étoait in sins interdit, al avoait foait demi-tour tout seule, person.ne n’étoait rintré ndin et pi ch’capot il étoait achteure in plein solé. J’ai foait demi-tour pi j’sus rintré à no moaison, coére fin réïu d’éch qu’i m’avoait arrivé.

Pi d’un seul cœup ch’o té conme in.ne étinchelle din m’tête ! J’ai té rondébilis dessatcher l’boutelle d’heule vide qu’os avoème mis à chés boueux. Pi lò j’ai li ll’étitchette : heule éd tornésol, importée d’Ukraine.

Pour chetlò qu’i n’éroai'té point coére comprins, os ons importé d’Ukraine éd l’heule éd tornésol qu’al étoait touillée d’heule minérale. Os nn ons point granmint intindu pèrler. Mais quoé qu’ch’est qu’os voulez, dsu in.ne mer d’heule, i n’y o point d’vague. Cho asplitchoait toute : ém biélédcoulée et pi m’voéture qu’a s’tornoait du côté d’éch solé !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/06/08

ÉCH PET BERNEUX

Vardi au soér, éj foaisoais d’l’imblée dvant in.ne trentain.ne éd gins qu’il étoai'té vnus m’acouter à ch’Théïâte d’Animation Picard. Ch’étoait pour conter l’avinture à chés Diseux. Histoére éd rire un molé, éj prinds à pèrtie mn anmi Jacques. Jacques, jé l’con.noais dpu pu d’tchinze ans. Jé l’ainme bien, pi j’croés qu’i m’ainme bien étou.

Jé ll’ai don interprins rapport à in.ne préface qu’il o signé din no diries 89. Din l’arnitoéle, il est mèrtché qu’ch’est li l’auteur. J’ai don dit qu’étoait hontabe d’és rapproprier ch’qu’i n’est point à li, qu’o n’pouvoait vraimint pu foaire fiate à person.ne… pi qu’aprés in.ne avinture pèrelle, chés Diseux i leus avoai'té déméfié d’tout l’mon.ne.

Ch’étoait des cacouilles, bié seur, minme siq in disant cho, j’étoais sérieux conme un pape ! Éj sus t-un molé du genre pinche-sans-rire, os savez !

Chés gins qu’i s’y con.noai'te i sai'té bien qu’chés référinchemints édsu chl’intèrnéte, o nn’est point moaîte. Ch’n’est point mi qu’i décide d’él plache éd no site din chés moteurs d’ércherche. Quanq os allez mon Gogole pi qu’os tapez diseux pi pèr aprés j’ai d’él chance os vous rtrouvez mon d’Chés Diseux. Éj nin sus contint pi minme fin fiér, mais ch’n’est point d’ém scieinche.

Pour éch qu’i nn est d’él préface à Jacques, j’ai fini pèr comprinde écmint qu’él méprinze al avoait cminché. Quanq o foait in.ne pèrution, qu’a fuche édz écrivures, ou eutes, o z-est tnu d’invoéyer deux eximplaires à l’Bibiothéque Nation.nale. Pi ch’est eux, un preume, qu’il ont prins leus bos pour leus cœuches. Ch’éro té in.ne éstagiaire qu’al éro rouvert no tchot livret pi qu’al éro vu, in bos d’él premiére page, él signure à Jacques. Ch’est conme cho qu’il est vnu l’auteur éd chés Diries 1989.

L’in.nui, ch’est qu’él B.N.F. ch’est un site officiel, gouvernémintal. Qu’i n’y o point d’adréche pour leu dire qu’i leus ont berluré. Tout ch’qu’il est gouvernémintal ch’est conme cho. No présidint i n’put point s’berlurer, no minisse éd la justice a n’put point s’berlurer, pi l’B.N.F. a n’put point s’berlurer nan pu ! Toute i vient d’lò. Pèr aprés, cho n’sert pu dé rien d’assayer d’foaire tchéque cose. Infaillibes qu’i sont !

Él samedi, éj rinconte tchéqu’un qu’i m’avoait acouté l’veille pi qu’i m’dit :
« Bé dis don, tu né ll’o point épèrgné chti d’éch Lanchron, cmint qu’i s’dénonme édjò ? »
Éj nin sus resté conme deux ronds d’flan ! Tout ch’qué j’avoais dit l-avoait don té invalé conme du boin pain ! Ch’étoait éch dégré zéro d’éch comprintis ! Pi pourtant, chti qu’i m’disoait cho, ch’n’étoait point l’mitan d’in.ne bête !

Édpu ch’temps-lò, jé n’vis pu, jé m’pose des tchestions. Bié seur, j’ai yeu tort ! Pi cmint qu’il o prins cho, Jacques ? Bié seur, i n’est pu temps d’mette és main à sin tchul quanq éch pet berneux l’est pèrti ! Mais cmint li dire éq jé n’trachoais point à méfoaire, éq ch’étoait pour du rire ?


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/06/08

ÉL JON.NESSE D’AURÉLIEN

Min grand-pére Aurélien il est né à Breilly in juhiet 1875. I n’avoait point coére un an qu’sin pére i défunctoait. Ch’étoait un accidint d’travail. Il étoait quèrtier, pi i s’a foait épeutré pèr és carrette.

És mére al s’a rmèrié avuc Jules Postel éd Ferriéres, pi du cœup tout l’famille al est vnue habiter à Ferriéres : Aurélien, és sœur Valentine et pi leu mére. Jules il étoait ménager. A n’étoait point l’Pérou, mais ch’n’étoait point la misére nan pu. In 1885 él famille al s’a ragrandi, y o in.ne tchote sœur, Maria, qu’al est arrivée.

Un an pèr aprés, Aurélien il étoait à l’ouvrage. Il étoait manœuve éd manchon. Feut dire qu’à Ferriéres, à pèrt deux troés raboureux pi tchéques ouvriers d’tchulture, tous chés honmes il étoai'té manchons pi, din chés courts-jours, copeux d’velours.

Chés manchons il alloai'té ouvrer Anmiens, à pied bié seur. I pèrtoai'té tertous insen.ne sur él cœup d’chonq heures du matin, à six heures i passoai'te à l’octroé d’éch wèrtier d’Marolles, pi à sept heures il étoai'te à l’ouvrage. Aurélien quanq il o yeu onze ans, avuc ses tchoté gambes, il leus o imboété l’pos. Ch’est conme cho qu’il o cminché dsu ch’chantier d’l’École Normale éd guèrchons, à Saint Acheul, éq ch’étoait coére à l’époque quasimint din chés camps. Cho li foaisoait tout d’minme point loin d’quatore tchilométes au matin pi autant au soér pour rintrer aprés s’jornée foaite !

Pi d’fil in adjuile, ou putôt éd pelle in treuelle, il est vnu ouvrier. In 1900 i cminchoait à t-ête érnonmé dsu l’plache d’Anmiens. I gaingnoait deux francs pèr jour mais i n’étoait point gêné d’tchitter s’plache pour avoér deux sous d’puss. Ch’est à ch’momint-lò qu’i s’a mèrié avuc Blanche, él file d’éch ménuisier, éch Phane conme o l’appeloait. Il ont yeu deux fius, Paul pi Pierre, min pére.

Aurélien i deschindoait coére tous les jours Anmiens, mais n-y avoait yeu du cangemint. N-y avoait pu qu’un tchilométe à foaire à pied pour aller dusqu’à l’grimpette d’éch tortillard. In.ne grimpette à mitan cmin d’Ferriéres et pi d’Saveuse. Tout conme i n-y in avoait in.ne à mitan cmin d’Djimicourt et pi d’Bovelles. Falloait point foaire éd jaloux !

Pi Aurélien il o yeu du galon, il est vnu chef éd chantier, pi vlò qu’ch’est li qu’il o yeu à quèrque éd construire éch câtieu pour éch deuxienme fiu d’él famille Saint éd Flixcourt. Ch’est conme cho qu’in 1912, él tchote famille al s’a rtrouvée à Ville-él-Marclet. Dusqu’à ch’moédeut 1914.

À trente-neuf ans, mèrié pi deux éfants, Aurélien il est mobilisé, i foait pèrtie éd chés territorials d’l’artillerie, vu qu’il avoait foait sin congé din l’artillerie.
In 1915 pi début 1916 il est à Verdun, durant l’fanmeuse bataille. Jé n’sais point grand cose édsu l’période-lò. I nin pèrloait point granmint. O dvroait putôt dire qu’i nin pèrloait point du toute.

Pi, fin 1916 il o té rinvoéyé à l’arriére, à Pèris pour dire toute, mais cho, cho sro pour éch prochain cœup.


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/07/08

AURÉLIEN QU’I MONTE QU’I MONTE…

Du cœup qu’min grand-pére Aurélien il o tchitté Verdun fin 1916, ch’étoait point pour t-ête libéré, bié seur éq nan, il o té nonmé cadoreux à Pèris ! Os maginez cmint qu’il étoait bénaise d’éne pu t-ête in premiére ligne ! Ouai, mais os n’maginez point cmint qu’il étoait inchepé pour éch qu’i nn est d’rinseigner chés gins dsu chés cmins qu’i dvoai'té prinde ! J’ai coére, din min guernier, éch djide qu’o li avoait don.né à l’époque. Éj pux vous dire qu’il o foait d’l’usage.

Adon l’famille al s’a rtrouvé à Pèris pour in.ne cope d’énnées. Chés deux fius il étoai'te in âge d’ouvrer, i leus ont don rtrouvé mon Montcocol. Coére in.nhui, siq os tapez Montcocol édsu Gogole, os vous aperchuvrez qu’ch’est in.ne interprinze éd bâtimints qu’al foait granmint d’affoaires avuc la RATP. Bé d’éch temps-lò ch’étoait du minme pèré, Montcocol il étoai'te in route à hanser échl’éstation d’métro Montparnasse-Bienvenue. Ch’est conme cho qu’Paul et pi Pierre il ont apprins leu métier d’manchon.

Quanq, él djerre finite, il ont rnu Anmiens, éch pére Hérouard il o dit à Aurélien :
« N-y o chu câtieu d’Flixcourt qu’i n’o point té fini, pi qu’ch’est ti qu’tu l’os inroéyé, ch’est ti qu’tu vos l’déroéyer, i reste éd quoé foaire, ch’est à ti d’juer. »
Ch’est conme cho qu’i leus ont rtrouvés coére un cœup tertous insen.ne à Ville. Él terrasse d’éch câtieu al o té foaite avuc du chimint d’édvant la djerre. Du chimint qu’il étoait à cassons pi qu’chés manchons il ont damé pi griblé. D’éch temps-lò, o n’gadrouilloait point !

Quatre ans pèr aprés, Aurélien i racatoait in.ne ancien.ne ferme din l’rue d’Cottinchy, Anmiens et pi i s’mettoait à sin compte. Avuc ses fius, bié seur ! Il ont cminché avuc point grand cose, un binèrd pour chés matériaux. Atchun sin tour, falloait prinde él bricole !

In 1929, ch’o té l’premiére camion.nette, in.ne Ford éd jé n’sais point qué modéle ! Asseuré qu’al n’étoait point d’premiére jon.nesse, mais ch’étoait tout d’minme miux qu’éch binèrd.

Tchéque temps pèr aprés, Aurélien, in rintrant l’Ford din l’cour, in mèrche arriére, forchémint, il o ériflé ch’pilaste d’él grand-porte. Ch’étoait point grand cose, cho né s’voéyoait minme point. Mais grand-pére il étoait conme cho, tout ch’qu’i foaisoait, falloait qu’a fuche d’étcherre. Ch’est conme cho qu’i n’o pu janmoais rprins ch’volant !

Pi j’croés bien qu’ch’o point té l’seul virage qu’il o prind d’éch temps-lò. Falloait bien tchéqu’un pour érchuvoér chés clieints pi foaire chés écrivures ! Ch’o té li, bié seur. Dpu ch’temps-lò, i n’o pu janmoais mis in.ne pelle din ch’mortier. Il étoait vnu bourgeoés sans minme sé nin rinde compte.


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/07/08

ÉCMINT N’POINT T-ÊTE RONCHON ?

Minme chés tortrelles qu’i leus y met'te : quanq i routél'te, os sz intindez pétête qu’i foai'te roucoucou, roucoucou ! vous eutes ? eh bin mi édpu in.ne cope éd jours, chetlò qu’i leu perque'te dsu ll’antin.ne télé d’min voésin, jé sz intinds qu’i cant'te tête éd con, tête éd con !

Os allez dire, jé l’sins, qu’i né m’feut point grand cose ! Est sûremint vrai, mais i feut dire qu’édpu deux troés jours, jé nn ai incorsé des rudes. Mais pétête éq jé m’foais dz idées, éq ch’est din m’cawette qu’a n’torné point rond ? Jé m’pose des tchestions !

Os savez qu’in face no moaison os ons achteure in.ne interprinze éd bâtimints. Bié seur, i nin feut, mais tanq à foaire j’éroais miux ainmé qu’al fuche point si prés, d’eximpe, à côté d’éch câtieu. Hier, il ont passé leu matinée à foaire édz épeulés-jtés avuc des bastaings éd quate métes éd long. Os maginez ch’busin ! Mais l’pire ch’est qu’à moins dé szés rbéyer, o n’s’y attind point ; à chaque cœup éj foaisoais des ébondies du diabe. Éd quoé qu’jé m’plains, il éroai'té pu foaire cho à l’pointelette, dsu l’cœup d’six heures du matin !

Coére bien qu’pour ch’quatore juhiet… Eh bin sié, justémint ! éch jour-lò ch’o té Jézone qu’i s’y a mis. Jézone, ch’est ch’tchot fiu d’min voésin Lucien – chtilòl qu’il o in.ne antin.ne avuc des oésieux sitant mal édutchés. Pi ch’est point d’és feute à Jézone siq ses pèrints i sont matchés d’feuilletons améritchains. N’impêque éq lò il o foait fort.

Éd deux heures à chonq heures d’érmontée, échl’halbran-lò il o foait clatcher pu d’in.ne chinquantain.ne éd pétèrds, à raison d’un tous les troés-quate minutes. Tout seu conme un grand, din ch’tchot bout d’gardin pa dvant leu moaison !

Éj vous intinds djò in route à dire éq jé n’sus qu’un viu romion.neux, et pi qu’éj n’indure pu éq chés éfants i leu jue'te. Ch’qu’i feut dire tout d’minme ch’est qu’échl’éfant-lò il o tchinze ans !

Mi à ll’âge-lò éj passoais mes vagances avuc Monique, él tchote file à Marie Boulanger, pi o nn’étoème pu à juer à papa-manman ou bin coére à ch’métecin. Éll énnée-lò, pour nous deux, ch’étoait putôt ch’blé in herbe.

Tchinze ans, mais os vous rindez don point compte : din troés énnées d’ichi éch gleude-lò il éro l’droét d’vote !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/08/08

AURÉLIEN, TOUTE I VO BIEN.

Ch’darin cœup, os ons don tchitté Aurélien tchéque temps édvant l’djerre éd quèrante. Ésn interprinze al torné rond. Ch’est li qu’i resse à rchuvoér él clieintéle pi qu’i foait chés écrivures. Min pére pi mn onque i sont manchons, des foés quanq i feut un cœup d’main, ch’est Arthur qu’o z-appéle ; Ponmier éch chimintier, li i varoait putôt du Limosin, n-y étou Tchot Phonse éch plâtrier.

Phonse, li ch’est un viu gars. I resse mon d’un bistrot, à ch’tchuin d’él rue du Blanmont pi d’él rue Daire. Un bistrot qu’il est tnu pèr Mame Vacavint, qu’al est véve ; ch’est chu hasèrd probabe ? Sin plaisi à Tchot Phonse ch’est sin rpos du diminche midi, ch’est réglé conme in.ne pindule.

Mame Vacavint al li foait tchuire un poulet et pi Phonse i llé minge in intier. Pour éne point s’étotcher, il o prévu l’cœup, il o acaté quate boutelles éd vin Nicolas, du viu cep, él seule tchestion ch’est qu’i feut qu’cho tchaiche jusse : éch darin morcieu d’poulet – éch solilesse bié seur – avu ch’darin gorgeon d’viu cep. Mèrchez, pour cho, Tchot Phonse ch’est un espert.

Chés deux manœuves, ch’est Alcide et pi Demay. Alcide, grand dépindeu d’andouilles avu s’djeule éd crapure et pi Demay, boin pére trantchille, et pi pour t-ête un boin pére ch’est un boin pére : il o vingt deux éfants !

Pi n-y o coére Monsieu Gout, éch comptabe, qu’i vient tous les vardis d’érmontée pour s’otchuper d’chés comptes – i n’sait mie foaire éq cho. Din l’été, à mesure, monsieu Bourgeoés, éch métreu, avu s’fenme et pi ses deux éfants i vien'té passer leu diminche aprés-dîner à Ferriéres. Des foés i vien'té minme du matin pi os mingeons tertous insen.ne. O n’pèrlé point coére éd résidinche ésgondaire, o dit putôt moaison d’campaingne.

Ch’est conme cho qu’un bieu diminche, min grand-pére i dit à m’mére qu’al prépèroait ch’dessert :
« Os savez qu’éch métreu pi s’famille i vien'té minger. Pour éch dessert, n’y o point d’tchutchute, i feut foaire in.ne niche à ch’pére Bourgeoés ! »
Pour ém mére ch’est in.ne affoaire intindue, vu qu’al est née-native éd Dreuil-Hamel. Éne dit-on point fous d’Ary, Dreu motcheux, Airain.nes imbléyeux ?

Éch dessert il arrive édsu l’tabe, ch’est in.ne crinme à chucolat din des tchotes gattes ; atchun il o l’sien.ne, pi os pinsez bien qué m’mére al o foait des tchotes mèrques, i n’feut point s’berlurer. Pi vlò tout l’mon.ne in route à s’papiner avuc él crinme. Éch pére Bourgeoés, qu’i n’est point né d’hier, i s’déméfie, avu s’tchote tchuillére i sint tchéque cose éd dur din sin gattelot, ch’est gros conme in.ne dragée ; sen.nant dé rien i llé met din s’bouque, i llé chuche un molé, ch’est un ptchot cailleu bis qu’i mourlon.ne un momint pi qu’i gliche in nsous d’és langue. Aurélien i mile éch pére Bourgeoés, i n’érbée minme point din l’sien.ne éd gatte. I n’voét mie qu’és tchuillére a n’rintré point din l’crinme édpu d’chonq millimétes…

À l’fin des fins, Aurélien i s’a aperchu qu’i n-y avoait din s’gatte un tchot morcieu éd carte à juer qu’i foaisoait un feux-fond, à minme point chonq millimétes d’éch bord. Ch’étoait li chl’arrouseur arrousé. Éch pére Bourgeoés il o démion.né sin cailleu bis pour pouvoér rire un boin cœup avuc tout l’mon.ne.

J’ai l’idée qu’tous chés gins-lò il étoai'te heureux d’vive. Éj vo point m’mette à ratrouiller, mais tout d’minme, in.nhui  ?


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/08/08

JÉ N’MINS POINT.

In disant dix ans, jé n’mins point : cho foait dix énnées édpu hier qu’éch baroumoaite il est vnu au mon.ne. Du début chés billets il étoai'te foait él premier pi l’tchinze du moés. Tchéques temps pèr aprés, os nous ons aligné dsu chl’Étchureuil ; no deuxienme tchinzain.ne al écminche él seize tout conme él sien.ne.

Éj dis no ch’est un pluriel éd majesté ! Os lé savez bien éq chés Diseux i n’exist'té pu qu’au travers éd leu site. Jé m’sins bien puss gardien d’musée éq baroumoaite !

Pi justémint, pour qu’éch musée i continuche à t-ête racachant, j’ai foait un molé d’ménage, et pi j’ai ramon.né chés porettes.

In preume, j’ai inlvé ch’copon d’écmande : pu dzoin d’copon d’écmande ; piq chés Diseux i n’exist'té pu, i n’y o mie pu rien à vinde ! Éd tous sins, i n’resté point grand cose, i n’y o quasimint pu d’CD d’éch Déglic non pu qu’d’éch Marister. I resté coére un eximplaire éd chés Diries 1985 mais jé l’warde pour mi !

Éd deuze, ch’qu’o n’vind point, éj pux coére él don.ner gratiss. Toute éne vo point s’foaire d’un cœup, mais pour in.nhui, ch’est Chés Fermages in intier qu’os allez pouvoér acouter ! J’éne garantis point qu’i n-y éro du nouvieu à chaque tchuin d’ziu ! Disons qu’in.ne foés dsur deux éj m’in vos tâcher d’agincer un nouvieu morcieu. Avuc cho, ém vlò d’l’ouvrage durant point loin éd deux énnées !

I n’feuroait point croère éq cho s’foaiche in soufflant dsu ! In preume i feut rprinde chés cassettes édsu chl’ordinateur. Et pi du cœup, éj nin profite pour rapproprier un molé chés inregistrémints. Est tellemint facile éq j’éroais tort d’éne point l’foaire. Soin ! j’ai dit facile, mais j’n’ai point dit qu’étoait rapide ! Fernand il éroait dit qu’a prind un certain temps. Él suite ch’est d’él gnognote : i n’resté pu qu’à rcanger ch’son in MP3 pour délordir éch bazèr et pi à l’lancher dsu l’intèrnéte.

Tout cho pour dire qu’à pèrtir d’in.nhui, Chés Fermages – éq ch’est ch’premier texe éd chés Diseux – os pouvez ll’intinde éd bistinbout in allant in bos d’él page éd chés "Diries 1985". Mais soin ! pour pouvoér él l-acouter i feut avoér FlashPlayer. Siq os n’savez point ch’qué ch’est, ch’est facile, os n’avez qu’a assayer. Siq a mèrche ch’est qu’os avez ch’qu’i feut, pi à l’arbout, siq a n’mèrche point, ch’est qu’os n’avez point ch’qu’i feut ! O n’put point reuver pu simpe !

I resté coére, édvant d’finir, à vous annoncher qu’éch liméro chint-dix d’éch Lanchron i vient d’t-ête dessatché, qu’il est din tous chés boin.nes librairies. Acatez-llé pi os voérez qu’éch liméro 110 i n’est point 110-e : seize pages d’édviseries édsur Chés Diseux.


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/09/08

CHÉS INNOCHINTS

O dit qu’a Ruminy chés gins
N’ont point granmint d’malice
O szés surlomme chés innochints
Mais ch’est in.ne injustice…
     (Émmanuel BOURGEOÉS)

Hier ch’étoait l’réderie à Ruminy, pi jusse conme j’arrivoais à l’intrée, vlò qu’éj voés dsu un mur, peinturluré avu du colta : non aux éoliennes. In boin picard : nan à chés meulins à vint . Ch’étoait viu, éch terque i cminchoait à tchair in flépes, mais sûremint qu’i sont coére conte in.nhui, pi qu’i n’ont rien deffacé !

I m’sen.ne à vir éq chés Ruminiens – mais pétête qu’i feuroait dire chés Ruminants… – i leu prin.ne'té pour Don Quichottte. Quoé qu’ch’est-ti don qu’i leus o prind pour és’n aller leu batte conte chés meulins à vint ?

Pétête qu’il ont yeu peur éq cho foaiche granmint d’busin ? Siq a put szés rapurer, éj leu rinfiquerai tout d’suite qu’o n’intind quasimint rien ! Siq il ont les freux d’avoér à rfoaire rapport à cho, éj leu déclatcherai sans attinde éq ch’est bien moins dingéreux qu’un téléphon.ne portabe !

Siq i pinse'té qu’ch’est point bieu, éj leu dman.nerai d’récompèrer avuc chés pylon.nes alectriques éd chonq chint mille volts qu’i trécope'té no poéyis. Pi cho, i n’est point asseuré qu’a fuche inoffinsif. Chti qu’i resse à londjeur d’énnées in dsous d’chés chonq chint mille volts-lò i n’fro pétête point d’viux os !

Mais pétête qu’i n’vouloai'té point rchuvoér chés pécaillons qu’a pouvoait leu rapporter ? Crainte éq cho szés foaiche évnir grandiers pi imbléyeux ? Édsu l’réderie, j’ai dmandé à chés gins, éj n’ai point yeu d’réponses. D’autchuns i m’ont dit qu’i n’étoai'te point d’ichi. In.ne, qu’al étoait din l’conmerce. Un eute, qu’i sroait putôt pour, mais qu’i n’osoait point l’dire éd peur qu’o li in vuche !

Mèrchez ! il ont bien raison. Chés Ruminiens, ch’est des malins ! Il ainme'té miux in.ne chintrale nucléaire in Neurmindie qu’in.ne éolienne din leu corti !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/09/08

QU’I MINGE'TÉ DU BATTU !

Ch’est in.ne méchante histoére, un conte à Robert Mon.nonque ! Soé disant qu’un jour éd dix-sept-chint-quatré-vingt-neu, él rein.ne Mèrie-Antoénette al éroait dit à perpos d’chés paures gins qu’i mouroai'té d’faim, qu’i n’avoai'té pu d’pain : « qu’i minge'té du battu ! »

Ch’est sans doute qu’al avoait li Rousseau ! No z-anmi Jean-Jacques il avoait djò écrit tchéque cose conme cho. Falloait-ti qu’a nn euche d’él mémoére  ! Vu qu’ch’étoait in dix-sept-chint-soéxante-dix-huit. Él-l’énnée justémint éq Charles Sanson l’o té nonmé bourrieu…

Tours est-ti éq tchinze ans pèr aprés, Mèrie-Antoénette al montoait chés mèrches d’él manicraque à Sanson. Pi qu’ch’étoait ni l’premiére ni l’darin.ne cawette à foaire un tchutromblet din l’mandlette éd rébulé !

Cmint qu’éj vous dvise éd cho in.nhui ? Bin ch’est pasqué j’ai idée qu’os ons foait un grand seut in arriére, in.ne ébondie à rtchulon éd pu d’deux chints vingt énnées. À in.ne époque adoù qu’chés grands – conme o disoait – i sont éd pu in pu grands et pi qu’chés ptchots i sont éd pu in pu ptchots. Nous vlò rnu à ch’temps qu’chés riches i leu nin met'te plein leus poques, qu’i nn’ont janmoais d’assez. Du temps qu’chés paures gins i sont grugés pi pressurés conme des pinmes à chide et pi qu’i n’ont pu d’quoé vive !

« Qu’i minge'té du battu ! » Pasqu’in puss o szés déméprise ! Point vrai Mame Lagarce ? « Siq l’essence al rintchérit, prindez vos vélos ! » Point vrai Mame Baquayeu ? « Siq vo z-asseurance al raugminte, cangez d’mutuelle ! » Ch’est-ti point du minme pèré ? Pi lò o n’put point mette cho dsu l’dos à Rousseau.

Os n’sonmes pu in nsous l’roéyeuté, pèroaît minme qu’os sonmes in République ! Él république éd chés copains pi d’chés cotchins ! Népoint Monsieu Toutamie du Phocea, népoint Monsieu du Glaviot d’ém Villacorse !

Pi pour bien foaire, no boin moaîte à tertous il aflate éch pape, vlò qu’la France al est rnue él file aîn.née d’l’église. Saint Bitard ora pro nobis. Pi i feuroait ahanser in.ne laïcité positive !

Soin à ti ch’Cayen ! ti qu’t’es djò négatif din chés sondages. Méfie-tté qu’un bieu jour tous chés pauves cons, in plache éd leu casser, din un grand cœup d’colére, i n’vienche'te à berziller toute !

Maginons un molé, pèr un bieu matin, no Roé Zikarsor qu’i nman.ne à l’duchesse De La Mame :

« Ch’est in.ne révolte ?
— Nan, sire, ch’est in.ne révolution ! »

Os n’allez tout d’minme point m’inlver l’droét d’reuver !

Posté Scriptome : bien l’bonjour à mamzelle Edvige.


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/10/08

COÉRE IN.NE COUCHE, PI IN.NE RUDE !

Éj n’ai point dzoin d’ém forcher granmint, o nn apprind du nouvieu tous les jours ! Vlò-ti point qu’éch djudjusse qu’i nous sert éd minisse éd l’Édutchation i nn o coére dessatché in.ne boin.ne. I pinse éq chés maristresses éd maternelle i passe'té leu temps à rcanger chés drapés à chés ptchots nasus. Nin vlò coére un qu’i nin tient in.ne rude couche ! Éj vous disoais din ch’darin tchuin d’ziu qu’o déméprisoait chés gins, bé vlò l’preufe coére un cœup.

Éj pèrloais étou d’chés copains pi d’chés cotchins. Ch’est Mohamed qu’i n’est point prêt dé l’oblier ! Deux mille euros d’aminde qu’il o yeu. Cho li apprindro à porter plainte conte in.ne gin bien plachée, os savez éch nivelet qu’i s’étoait foait déroufler sn éscouteur. Vlò qu’éch Mohamed in tchestion il avoait invintion.né qu’i s’avoait foait berziller s’carrette pèr chu fanmeux scouteur !

Soin à ti, Mohamed ! Damien, li, il o té équèrtelé pour un méchant cœup d’aleumelle à Louis Tchinze. Éch paure roé i n’o yeu qu’in.ne affolure dé rien. Ch’étoait tout d’minme un crime éd lése-majesté. Pour miux dire, vlò un estrait d’sin jugemint :

[il sera…] mené et conduit dans ledit tombereau à la Place de gréve ; et sur un échafaud qui y sera dressé, tenaillé aux mamelles, bras, cuisses et gras de jambes, sa main droite, tenant en icelle le couteau dont il a commis ledit parricide, brûlée de feu de souffre ; et, sur les endroits où il sera tenaillé, jeté du plomb fondu, de l’huile bouillante, de la poix-résine fondue, de la cire et du soufre fondus ensemble ;
Et ensuite son corps tiré et démembré à quatre chevaux, et ses membres et corps consumés au feu, réduits en cendre, et ses cendres jetées au vent…

Jé ll’ai point rmis in picard, conme cho chés boins juges à no boin moaîte i n’éront pu qu’a llé rcopier. Éne t’avise janmoais d’ércmincher, apré Mohamed. Surtoute avuc un nom pèrel !

Bié seur, cho foait deux moés qu’o nous bassine qu’éch Tchernobyl bantchaire i n’passero point nos frontiéres. Bié seur, ch’est in route à s’foaire, et pi j’ai wardé ch’puss boin pour él fin finale.

Chés banksters qu’il ont foait crouler toute in sé nin mettant plein leus fouillousses, i peu'té dormir trantchille édsu leu magout pi dsu leus deux érelles. No gouvernémint i s’in vo rinflouer tout cho avuc chés livrets d’tchaisse d’épèrgne ! Os avez pétête érmèrtché qu’din rinflouer n-y o flouer ? in boin picard cho vut dire rbiteler !

Vivemint ch’quatore éd juhiet, nom dé Dju !…


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/10/08

CHÉS ANDJILLES ÉD CANEÇON

In picard, quanq in.ne file a nn o prind pour ses trente-six mèrdis, o dit qu’al o té pitché pèr in.ne andjille éd caneçon ! Minme siq ch’est ch’premier cœup qu’os intindez cho, os avez tertous comprins éch qué ch’est qu’in.ne andjille éd caneçon, point dzoin d’vous foaire un dessin !

Siq éj vous pèrle d’andjille éd caneçon, ch’est rapport à in.ne histoére tchurieuse – chés gins du Vimeu i diroai'té rédeuse, mais os sonmes din l’Anmiénoés, cho foait qu’no histoére al restero tchurieuse !

Conme tout chés baroumoaites, éj sus, pu souvint qu’à min tour, in route à lancher Gogole édsu ch’mot diseux, tchestion d’savoér chetlò qu’i leus intéresse'te à nous et pi qu’il ont, à mesure, foait un liage édpu leu site dusqu’à l’nôte. Ch’est in.ne occasion d’foaire leu con.naissanche et pi dé szés rmercier…

Ch’est conme cho qu’l’eute jour au soér éj déteupe éll affoaire-lò :

je quiffe slipknot je connait presque tout sur eu il vont encore sortir un morceau cette année 2008 mais il diseux s’est dur de faire ca a 9 nous pronons notre temps%5E%5E j’ai trouver ca sur un site de slipknot je suis fanne je quiffe surtout joey jordison le bateur je suis bateur moi alors je joue defois s’est moceau de slipknot le morceau prefairait de joey s’est korn s’st mas music qu’il aime sont masque est un masuqe japonait utiliser pendant le theatre japonais il y a une histoire s’est que joey retrait chait lui sa grand mere etait dans l’arbre elle est desendue est joey la vue avec le masque alors joey a eu peux alors il est partie. apres je sais aussi que joey a jouer dans plein d’autre groupe conme merdodolls marilyn manson ex plein dans merdodolls joey etait gitariste cool nn %5E%5E bon moi je dit pour la music s’est cool j’aime pas le clown il est trop nul il bouge trop est il a rien de particulier sens vexait les autre personne qui aime le clown bon s’est marent de pèrler mais je connait le premier ga qui a fait montrait sont masque s’est joey le premier a faire voir sont frai visage. apres s’est corey qui a fait voir sont frai visage en 2e bon j’ai finie de expliquer se que j’avait a dire alors pèrler moi%5E%5E

Rien à vir, qu’o m’direz, avu nos andjilles éd caneçon ? Eh bin sié ! éj min vos vous asplitcher : j’ai rbéyé ch’qu’a vut dire knot din un diction.naire, un knot ch’est un nœud, pi pour mi un slip ch’est un caneçon ; à l’fin finale, un nœud din un caneçon, quoé qu’ché nn est, à vo avis ?

Mais in tous les cas, n’y o point à dire : siq un bieu jour, nous eutes Picards os tchaisons d’avis pour nos écrivures, i nous restero rudemint d’l’ouvrage : s’attatcher à chés écrivures in français.


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/11/08

ÉL MORT D’UN NTCHIEN…

No minisse Christine Duracell al l’o dit, rdit pi ratadit :
« Él crise ? Qué crise ? I n’y o mie d’crise ! »
Adon in.nhui os sonmes in plein ndin ! Point tasseulemint nos deux pieds pi nos deux mains… Nan ! dusqu’à no cou qu’os sonmes din ch’brin ! À tel point qu’no boin moaîte il o coére foait des miraques : il o dessatché pu d’chint-soéxante-dix miyards d’euros éd chés tchaisses. Des tchaisses qu’il étoai'te vides, archivides édpu qu’i s’a raugminté éd chint-soéxante-dix pour chint.

In puss éd cho, n-y o un lampisse, mon chl’tchureuil, qu’il o étramé pu d’sept chints miyons d’euros. Pinsez qu’avuc chés pécaillons-lò, no boin moaîte il éroait pu s’acater deux aréoplanes éd puss pour és déplacher din l’mon.ne intier ! Mèrchez, a n’est point aisié éd t-ête à l’tête d’in.ne étchipe éd bros d’toéle !

Et pi tout d’minme, rapport à l’crise – qu’a n’existé point, népoint, mame Duracell – aprés chés banques, no boin moaîte i s’in vo écorer chés interprinzes. Pi d’où l’prinde, échl’èrgint-lò ? eh bin mon chl’tchureuil, bié seur ! Os savez, lò qu’chés paures gins i lanche'té chés tchéques sous qu’il ont pu mette éd côté… alorss siq o cminche à gadrouiller chés noésettes d’échl’étchureuil, adoù qu’os allons, hein, mame Duracell ?

Ém vlò coére érpèrti din tous mes ratrouilleries, ch’est pourtant point d’cho qu’éj vouloais vous dviser in.nhui ! Éch qu’éj vouloais vous dire, ch’est qu’édpu lundi, j’ai pu dormir tout min soul, édsu mes deux érelles, dusqu’à des neuf heures du matin ! Pu d’lancher d’pèrpaings pi pu d’épeulé-jté d’bastaings ! A n’est point croéyabe ! Qué silinche ! Un silinche éd mort, tchéche qu’i sait ? O put tours reuver, point vrai ?

Chés cafouilleux d’in face no moaison i sont-ti in vagances ou bin i sont-ti à joc, éj né l’sais point – a n’est point coére ész intempéries. Éch qu’éj sais ch’est qu’din l’cours i n-y o lò troés camion.nettes qu’i n’ont point bougé d’un tour éd reue édpu quasimint in.ne ésmain.ne. Soin, ch’est qu’à l’heure tch’il est, éch bâtimint, ch’est casvel conme a n’est point permis !

Chés contrévints d’éch patron i sont freumés tout l’long du jour. I n’est point in prison. Point coére, os llé séroème ! Éch maire il éroait djò foait in.ne tchête pour li foaire porter tchéques oranges. Pétête qu’il est rintré direc din ch’paradis ? Os savez éch fanmeux paradis fiscal ? Pèraîtroait minme qu’i n-y in o pusieurs !

In tous les cas, jé n’vos point m’plainde, pourvu qu’a durche ! Siq chés ouvriers i leu rtrouve'té sans ouvrage, no boin moaîte, avuc mes sous, i leu baillero tchéques flépes – point granmint, il o djò tout don.né à chés banques – histoére qu’i n’meurche'té point d’faim ! Mais quoé qu’ch’est qu’os voulez, à mesure o dit :
Él mort d’un ntchien, ch’est l’vie d’un leu !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/11/08

A NÉ M’DÉRINGE POINT D’PERDE !

Éj vous ai djò pèrlé d’no z-Évatchuation, avuc grand-pére qu’il avoait sin permis d’conduire et pi au côté d’li, ém mére qu’al étnoait ch’volant d’él camion.nette B14. Un bieu jour éj vous conterai, bié seur, cmint qu’ses fius, Paul pi Pierre il avoai'té hansé un abri conte chés bombèrdémints.

« Méfie-tté, Blanche, észés vlò ! » : ch’est conme cho qu’Aurélien i prévnoait m’grand-mére, qu’al étoait sourdiuse. Ch’étoait quanq chés fortéresses volantes améritchain.nes i vnoai'te lancher dsu Anmiens chés bombes pour démasingler l’gare éd triage éd Longueau. Chés restrictions d’la djerre, éch ration.nemint, tout cho, jé ll’ai djò dit !

Aurélien il avoait in.ne sœur, Valentine, éq nous eutes os appeloème Man-Titine ; al avoait troés quate énnées d’puss éq li. Il avoait étou in.ne énemie-sœur, Maria. Feut dire qu’Aurélien, il avoait té orphelin d’sin pére, Valentin, qu’i n’avoait point coére six moés ! És mére, Aurélie, al s’avoait don rmèriée avuc Jules Postel, qu’il étoait d’Ferriéres. Éd lò, no tante Maria.

Quanq i y avoait d’l’essence – ch’est qu’ch’étoait tchéque cose éd putôt rère durant la djerre ! – min pére i nous inmnoait à Ferriéres din l’B14 avuc Pépére-Mémére pi os alloème souhaiter l’bonjour à chés tantes : Man-Titine, Tante Thasie pi Tante Maria.

Man-Titine, al vivoait avu s’file Raymonde, qu’à Ferriéres o z-appeloait Raymonde-Valentine pour point l’confonde avuc Raymonde-l’Anglaise. Os étoème atcheuillés à bros ouverts. Qu’il étoai'té-ti contintes éd nous vir !

Tante Thasie, ch’étoait in.ne sœur à Blanche, al étoait divorchée pi al restoait din ch’tchul-d’sau, avu s’file Marcelle. Ch’étoait ch’jour pi la nuit avuc Man-Titine. Tours al sé plaindoait :
« Os né vnez janmoais m’vir, éj pourroais bien moérir ! Jé n’mé sins pu d’mes reins, éj nin dors pu, jé n’sais point cmint m’mette pour t-ête bien ! Pierre, tanq t’es lò, tu n’pourroais point m’fouir éch tchot bout d’gardin-lò ? mi avuc min dos… Ah mèrchez, a n’est point bieu d’viusir !… »

Tante Maria al étoait véve éd djerre, al restoait tout seue, és file, Ghislaine al étoait maristresse à Camon. Drés qu’os arrivoème mon Tante Maria, al sortoait ch’ju d’bidets dé sn eurmoére et pi, aïte aïte, os nous installoème autour d’él tabe pi os foaisoème des pèrties du diabe. O diroait qu’jé l’intinds coére, ém tante Maria quanq al disoait tout riant :
« A né m’déringe point d’perde, mais jé n’vux point qu’Calais i gaingne ! »

J’ai idée qu’in.nhui, à Reims avuc chés socialisses, i n-y o granmint éd tantes Maria din chés nénéphants roses, mais eux-eutes, ch’est point pour du rire : i n’feut surtoute point qu’ész eutes i gaingne’te !


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

01/12/08

ÉCH BROUTTEUX

Jules Watteeuw il étoait Tourquégno, il o té chintenaire à deux énnées prés, pi qu’il est éd dix-huit-chint-quèrante-neu pi qu’il o défuncté in dix-neu-chint-quèrante-sept. Et pi il o granmint écrit din ch’pèrlage éd Tourcoing, sin poéyis. Sin surpitchet ch’étoait Ch’Broutteux. A vnoait d’éch qué chés Tourquégnos i travailloai'té quasimint tertous pour chés usines éd filature éd Roubaix, et pi qu’il alloai'te avu des bérouettes tcheur et pi rinmner leu ouvrage édsu l’route éd Tourcoing à Roubaix.

Sin premier texe in patoés – conme o disoait d’éch temps-lò – ch’est inne héritance. Cho date éd 1879. Bié seur, Dany Boon i n’étoait point coére au mon.ne, mais minme éch mot chti i n’existoait point !

Ch’est din les Croix de bois éd Roland Dorgelès in 1919 qu’o rinconte éch mot ch’timi pour éch premier cœup. Ch’est point li qu’il o maginé cho, il l’o intindu durant l’djerre quatore. Ch’est un mot invintion.né pèr chés poélus – coére un mot qu’i n’existoait point dvant la djerre ! Éd doù qu’i s’dessaque éch mot chtimi ? i n-y o bien des gins qu’i leus ont posé l’tchestion pi qu’il ont té tracher des raisons point possibes. Mi, i m’sen.ne à vir éq pour tchéqu’un qu’i n’est point d’pèr ichi, qu’i n’comprind point quanq o li pèrle in picard, d’éch qu’il intind, i n’értient point grand cose : ch (ch’co i cante), ti (ch’est à ti) et pi mi (mi, voés-tu)
I suffit d’mette tout cho à l’tcheue-leu-leu pour avoér chtimi qu’i varo pu tèrd chti .

Pour éch qu’i nn est d’chés écrivures à ch’Broutteux, éj vo vous laissier vous rinde compte pèr vous minme, ch’est-ti du chti, Biloute ? ou bin du picard éd Tourcoing ? À vous d’vir, évlò Charlotte !

CHARLOTTE

L’homm’ à Charlott’ y-est sus sin lit.
Ben amoutchi d’in romatique :
« J’sins ben que j’vas… morir… qui dit.
« Pour mi, n’a pus… ni craq', ni crique,
« Acor, si j’aros l’tchœur contint
« Mais inn’ saquo… fait min tourmint.
« Accout’ femm'… tout bas.., à t’n’orelle
« No vijin,
« Cho Bédjin,
« Qui… est toudischi qui trandelle
« J’sus seûr que… tchan que j’trai moru
« Y va t’demander… in mariache
« D’vant deux mos… y tra raccouru,
« Méfitt’ saitt'… y n’a po d’corache;
« Ch’est in oj’leu,
« Ch’est in buveu,
« Y-est toudis vin… les tchamps… qui drache
« Mi, j’n’ai jomais… povu l’sintir.
« Si te l’fais… te… vas t’erpintir ».
 So trintchill’, va, répond Charlotte
« J’ai donné m’parole à in aute ».

(pèru in 1891)


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

16/12/08

SERVIR BIEN CŒUD

Diminche passé, din no télé région.nale, il ont annonché qu’in.ne chasse à courre al s’avoait fini din un gardin d’un tchot village éd l’Aisn.ne. Os ons pu vir un cerf, din un tchot bout d’flim ; bié seur, i n’est point des pu vertillant, mais minme s’il hanse un tchot molé d’avoér té porsui, i n’vo point pu mal éq cho.

Chés cacheux avuc leu rhabillure rouge et pi leu trompe à l’intour éd leu co il ont rintré din l’propiété et pi il ont escoffié él paure bête ! Os n’ons point vu grand cose dé l’mise à mort, tasseulemint ch’qu’os ons pu vir à n’étoait point des pu racachant, i n-y o point d’quoé foaire éd l’imblée. Un molé pèr aprés, in.ne brave fenme, avuc sin parapluie, al cachoait chés tchiens in route à s’atchénir édsu ch’bétail coére tout cœud pour li matcher ses breuilles !

Pi os ons vu un d’chés cacheux, un chef-cacheux, probabe. Il o asplitché qué l’bête al étoait à l’artique éd la mort édvant qu’al euche rintré mon d’chés gins et pi qu’il avoai'té servi pour mette fin à sn agonie. Servir, din ch’jèrgon d’chés gins-lò, cho vut dire tuer. D’eximpe, o put dire conme cho : Louis XVI il o té servi él 21 d’janvier 1793 à 10 heures dervant non.ne. N’impêque éq des ratros pèrels qu’i nous vien'té éd du temps d’chés roés, i sont coére in usage in.nhui.

Ch’qu’o put dire étou ch’est qu’éch cacheux-lò i con.noaît bien chés loés. Il avoait bien apprins sn élçon. Siq os allez ranser dsu ch’site officiel et pi gouvernémintal d’él cache, vlò ch’qu’os pourrez y déteuper :

Le chasseur qui blesse mortellement un animal peut le récupérer même sur le territoire voisin, car il en est devenu le propriétaire par l’acte de chasse. Toutefois, pour récupérer l’animal, il doit solliciter l’autorisation du propriétaire voisin.

Éch propiétaire i n’étoait point à s’moaison, i né ll’ont don point sollicité du toute, mais ch’est point grave. Él paure bête al souffroait l’mèrtyre, i falloait l’soulager, pi rondébilis coére. Chés cacheux ch’est des gins sinsibes os savez, i n’indure'té point d’vir souffrir in.ne bête ! O n’put don rien leu rpreucher.

Tout d’minme, maginons un momint qu’éch propiétaire i s’dénonme Christian Glaviot et pi qu’i fuche tchul pi cmise avu no boin moaîte à tertous, cmint qu’al sé jueroait, ll’affoaire- lò ?

In attendir, chés nation.nalisses corses i n’ont point seu leu définde conme i feut : il étoai'te in route à cacher à courre ; él paure bête – un coquiaco in blanc-fer – il étoait djò à mitan rousti quanq il o rintré mon Cacouille. Éch propiétaire il étoait point lò, alorss, éch coquelet i ll’ont servi vite foait bien foait, à l’indroét qu’il avoait tcheu : din l’piscine à no paure Cacouille ! il éroai'te asplitché tout cho à ch’juge, il éroai'te té atchittés. Éch juge il éroait-ti osé dire :

Dans cette affaire, on a bafoué les droits constitutionnels de M. Cacouille qui font d’une maison un asile inviolable et on a enfreint la loi.


[01/01/07] [16/01/07] [01/02/07] [16/02/07] [01/03/07] [16/03/07] [01/04/07] [16/04/07] [01/05/07] [16/05/07] [01/06/07] [16/06/07]
[01/07/07] [16/07/07] [01/08/07] [16/08/07] [01/09/07] [16/09/07] [01/10/07] [16/10/07] [01/11/07] [16/11/07] [01/12/07] [16/12/07]

Adé

archives 1er semestre 2009 archives 2007
DANY M’A TUER !

Je l’brayou bien, je m’en doutais, j’en étais sûr : Un picon bière jour je me retrouverais au chômage et je cherais remplacé pèr une machine électronique qui ferait l’boubourse d’œil à ma place.

Mais tout ed’ même, je ne chavais pas que c’était pour bientôt, je ne pensais pas que ch’cherait aussi rapide, je n’imaginais pas que ch’cherait pour aujourd’hui. Eh bien chi ! mes amis, c’est fait, je chuis mis à l’mine ed’ charbon et c’est mon dernier billet.

Je ne chuis même pas sûr que pour cette fois-ci, ch’ne chera pas l’gueulard ed’ haut fourneau qui va faire mon travail. Qui chait ? Bien tombé n’est jamais mal chu, c’est précisément quand nous voila l’picon bière avril que ch’chatané appareil va me mettre à l’fricadelle !

Et pourtant, je ne manquais pas d’idées pour une fois, j’en avais même à foison. Ne cherait-ce que vous pèrler ed’ Ratada Dichi – qui cherait plutôt d’ailleurs.

Figurez-vous qu’elle a gaspillé et croqué en trois mois plus ed’ deux tiers ed’ chon po d’chuc ed’ réception pour l’année. J’ai fait l’nig’doul, ça fait quèrante-cinq smig mensuels, ou encore choixante-douze pensions ed’ handicapé, tout ça envolé en mangeaille pèr ed’ chipoteurs qui pignochent tout en dressant en l’air leur petit doigt.

Et quand on y pense, c’est impressionnant ! Ça en fait une quantité d’amuse-gueules, une tripotée ed’ petits fours, une abondance ed’ noisettes grillées-salées ! À manger conme quèrante-cinq, on pourrait ch’attendre à ch’que l’Vaque en question choit devenue une éspéce ed’ dondon, une grosse enflée, c’est tout l’inverse, voilà qu’elle est quasiment squelettique, musclée conme un anophèle !

Enfin, je ne vais pas vous déféquer une pendule avec un boubourse ed’ bois. L’abrandoulle est fait, et tout ça, deul’ caïelle à Dany. Il y a moins d’un mois que chon gueulard ed’ haut fourneau est chorti et voilà, l’nig’doul automatique deul’ français en chti a été construit ! Allez, ils ne perdent pas leur temps dans l’Tchiot jaune !

Adieu mes bons amis, je vous aimais bien et j’aurais voulu tenir encore un tchiot jaune moment, au galaffe jusqu’au mois d’août, ça aurait fait pile-poil dix ans !!!

 

 

DANY M’A TUER !

Je le savais bien, je m’en doutais, j’en étais sûr : Un beau jour je me retrouverais au chômage et je serais remplacé par une machine électronique qui ferait le clin d’œil à ma place.

Mais tout de même, je ne savais pas que c'était pour bientôt, je ne pensais pas que ce serait aussi rapide, je n’imaginais pas que ce serait pour aujourd’hui. Eh bien si ! mes amis, c'est fait, je suis mis à la porte et c'est mon dernier billet.

Je ne suis même pas sûr que pour cette fois-ci, ce ne sera pas le robot qui va faire mon travail. Qui sait ? Bien tombé n’est jamais mal chu, c'est précisément quand nous voila le premier avril que ce satané appareil va me mettre à la porte !

Et pourtant, je ne manquais pas d’idées pour une fois, j’en avais même à foison. Ne serait-ce que vous parler de Ratada Dichi – qui serait plutôt d’ailleurs.

Figurez-vous qu’elle a gaspillé et croqué en trois mois plus des deux tiers de son budget de réception pour l’année. J’ai fait le compte, ça fait quarante-cinq smig mensuels, ou encore soixante-douze pensions de handicapé, tout ça envolé en mangeaille par des chipoteurs qui pignochent tout en dressant en l’air leur petit doigt.

Et quand on y pense, c'est impressionnant ! Ça en fait une quantité d’amuse-gueules, une tripotée de petits fours, une abondance de noisettes grillées-salées ! À manger conme quarante-cinq, on pourrait s’attendre à ce que la Ratada en question soit devenue une espèce de dondon, une grosse enflée, c'est tout l’inverse, voilà qu’elle est quasiment squelettique, musclée conme un anophèle !

Enfin, je ne vais pas vous déféquer une pendule avec un ressort de bois. Le coup est fait, et tout ça, de la faute à Dany. Il y a moins d’un mois que son film est sorti et voilà, le traducteur automatique du français en chti a été construit ! Allez, ils ne perdent pas leur temps dans le Nord !

Adieu mes bons amis, je vous aimais bien et j’aurais voulu tenir encore un petit moment, au moins jusqu’au mois d’août, ça aurait fait pile-poil dix ans !!!

 

DANY I M’O TUER !

Jé l’savoais bien, éj mé nnin doutoais, jé nn étoais sûr ! Un bieu jour éj m’értrouvaroais à joc et pi j’sroais rimplaché pèr in.ne machinerie alectron.nique qu’al froait ch’tchuin d’ziu à m’plache.

Mais tout d’minme, jé n’savoais point qu’étoait pour biétôt, jé n’pinsoais point qu’a sroait tout rade, jé n’maginoais point qu’cho sroait pour in.nhui. Eh bin sié ! mes gins, est foait, éj sus mis à l’porte et pi ch’est min darin billet.

Jé n’sus minme point sûr éq pour éch cœup-chi, cho n’sro point l’manicraque qu’al vo foaire émn’ouvrage. Tchéche qu’i sait ? Bien tombé n’est janmoais mal tcheu, ch’est à l’adon qu’nous vlò à ch’preume d’avri qu’éch nom-dé-zeu d’atrintchillage-lò i s’in vo m’foute à l’porte !

Pi pourtant, jé n’mantchoais point d’idées pour un cœup, jé nn avoais minme à l’gron.née. Cho n’sroait-ti qu’éd vous dviser éd Ratada Dichi – qu’al sroait putôt d’eute pèrt.

Fidjurez-vous qu’al o étramé et pi coére crotché in troés moés pu des deux tiers éd sin pécaillon à répilés pour l’énnée. J’ai foait ch’compte, cho foait quèrante-chonq ésmigues pèr moés, o bien coére soéxante-douze pinsions d’affligé, tout cho involé in maquerie pèr des nactieux qu’i plucsine'te toute in dréchant in l’air leu tchot ditelet.

Et pi quanq o z-y pinse, ch’est qu’ch’est conséquent ! Cho nin foait-ti un mont d’amuse-djeules, in.ne calebasse éd tchots fours, in.ne batracée d’noésettes grillées-salées ! À minger conme quèrante-chonq, o pourroait s’attinde à ch’qu’él Ratada-lò al fuche évnue in.ne éspéce éd dondon, in.ne grosse matante, tout du contraire, vlò qu’al est quasimint conme in.ne seuterelle, ablotchée conme un bibache !

Infin, j’éne m’in vos point vous tchier in.ne pindule avuc un rsort in bos. Ch’cœup il est foait, pi tout cho d’él feute à Dany. N’y o point seulemint un moés qu’sin flim il o té dessatché, pi vlò ch’traducteur mécanique éd français in chti qu’il o té hansé ! Mèrchez, i n’perde'té point leu temps din ch’Nord !

Adé mes boins anmis, éj vous ainmoais bien, pi j’éroais voulu coére étnir un tchot momint, tout du moins dusqu’à ch’moés d’ahoute, cho éroait foait pile poéille dix ans !!!