feut point reuver !

Ah… mes gins, os n’allez point m’croère : diminche passé j’ai té voter ! Éch darin (darin signifie dernier) cœup, ch’étoait in 2002, à chés élections présidintielles, à ch’deuxienme tour, Chirac Le Pen. Pi j’avoais juré, à l’époque éq jé n’voteroais pu janmoais. Cmint (Cmint signifie comment) qu’j’ai pu canger d’avis conme cho, j’m’in vos vous l’dire.

Quanq jé m’sus rinveillé él sept juhiet au matin, j’avoais m’cawette (cawette signifie caboche) tout infnouillée (infnouillée signifie chamboulée, vient de infnouiller) , déringée pèr un drôle éd reuve éq j’avoais foait pèr nuit. J’ém ramintuvoais (j’ém ramintuvoais signifie je me souvenais, vient de s’ramintuvoér) point bien, ch’étoait touillé din m’chervelle, pi d’un seul cœup, toute i s’a éclairchi, j’érvoéyoais toute tel qu’éj l’avoais reuvé.

Él vlò, min reuve : éj vos foaire court, ch’est ch’dépouillemint d’échl éscrutin pi vlò qu’i manque in.ne voéx à Ruffin pour t-ête éli, él mien.ne, bié seur. Du cœup Nathalie Machin-Truc al est l’deux-chint-quatré‑vingt-neuvienme élie d’éch pèrti à Marine. Ch’est un désaste, in.ne catastrophe : L’estrême droéte al o gaingné, al o l’majorité !

Aprés un reuve pèrel, quoé qu’ch’est‑ti qu’os éroète foait, vous-eutes ? Bé mi, j’ai trifouillé din min porté‑feuille. À forche éd déheuter (déheuter signifie fouiller) , j’ai déteupé (déteupé signifie trouvé, vient de déteuper) m’carte d’électeur qu’a n’avoait janmoais servie, jé ll’ai signée et pi, avuc, j’ai té voter. Ch’o té pu fort éq mi !

Achteure (Achteure signifie maintenant) o put nin rire et pi dire, tout conme Chirac in 2002, éq jé m’sus, coére (coére signifie encore) un cœup, bien foait ramaliner (ramaliner signifie berner) , rbinder (rbinder signifie pigeonner) , rbiteler (rbiteler signifie couillonner) , rtcheusser (rtcheusser signifie baiser) … tout ch’qu’os vourrez. A serviroait‑ti à tchéque cose qu’éj diche (diche signifie dise, vient de dire) in.nhui (in.nhui signifie aujourd’hui) qu’o n’m’y rprindro pu, qu’éj sus vatciné ?

Éd tous sins, i n’feut point reuver, éj vourroais bien m’berlurer (berlurer signifie tromper) , mais j’ai idée qu’éch prochain cœup, qu’éj voéche (voéche signifie aille, vient de aller) voter ou bin nan, os n’y écaperons point !

Éch baroumoaite,
pèr éch seize éd juhiet 2024.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.