viu conme mes robes

(mes robes ? mes robes ? des robes d’évêque, putôt !)

Ch’cœup-chi, cha rmonte à soéxante ans in arriére tout jusse. Ch’est l’rintrée univarsitaire. Éj sus t-in poste à ch’C.S.U.(*) [Collège Scientifique Universitaire] d’Anmiens. Os sonmes installés din chl’Évéché au côté d’él Cathédrale. Éj foais mes cours din l’ancien.ne cambe (cambe signifie chambre) à coutcher dé chl’évêque. Un évêque qu’i né s’moutchoait point avuc sin pied, i voéyoait grand, vu qu’mi pi mes chint (chint signifie cent) -vingt étudiants os nous y tnons à l’aise, din s’cambe à coutcher !

Mais vlò qu’i feut qu’éj trache (trache signifie cherche, vient de tracher) aprés des salles pour foaire foaire des colles à nos étudiants pèr des professeurs éd lycée. Ch’est conme cho qu’un bieu jour, éj m’értrouve à l’École des Métiers d’él Société Industrielle, rue Alexandre Faton, point d’trop loin d’no cambe d’évêque, don. Éj sus t-avuc éch Directeur qu’i m’foait visiter. I rinte tout pèrtout, sans janmoais butcher (butcher signifie frapper) à chés portes, qu’i y euche (qu’i yeuche signifie qu’il y ait, vient de avoér) des gins ou qu’i n’y in euche point.

Ch’est conme cho qu’d’un seul cœup, os rintrons in forche din in.ne salle. Chés éléves et pi ch’professeur tout dbout, conme édz éstatues ! Pi lò, dvant mi, dsu ll’estrade, Ver Nuisant ! Jé ll’ai rcon.nu tout d’suite, pi li étou (étou signifie aussi) , qu’i m’o rcon.nu, jé l’voés din ses ziux !… Ver Nuisant ch’est point sin nom, ch’est ch’surpitchet (surpitchet signifie sobriquet) qu’os li avoème don.né. I s’appéle Vermeeche ou bin Vermesse, jé n’sais pu bien.

Tout d’un cœup, éj m’érvoés troés ans pu tôt, in route à foaire min congé (congé signifie service militaire) à l’Caserne Friant. Ver Nuisant il est ieutenant, un minguerlet (minguerlet signifie maigrelet) un molé (un molé signifie un peu) langreux (langreux signifie chétif) éq sin plaisi ch’est d’raplatir (raplatir signifie ici humilier) chés appelés, i s’atchénit (i s’atchénit signifie il s’acharne, vient de s’atchénir) surtoute édsu chés sursitaires. Jé m’ramintuve (jé m’ramintuve signifie je me rappelle, vient de ramintuvoér) chés mèrches avuc tout no z‑atrintchillage (atrintchillage signifie barda) édsu no dos, chés raques (chés raques en français la gadoue) doù qu’i feut qu’os nous traîn.nonche à plat panche (à plat panche signifie à plat ventre) , tout cho sui (sui signifie suivi, vient de suire) , troés heures pèr aprés, d’in.ne érvue d’détail. Din des momints pèrels, éj reuvoais d’mé rvinger, éj pinsoais : sale carongne (carongne signifie charogne) , un jour éj té frai létcher mes orteux – feut vir l’état qu’il étoai'te –, j’té frai matcher mes candouilles (candouilles signifie crottes de pied)  !…

In moins d’in.ne ésgonde, éj comprinds. Conme granmint (granmint signifie beaucoup) d’eutes, Ver Nuisant i n’o point incorsé (incorsé signifie accepté, supporté, vient de incorser) chés Accords d’Évian, évnant pèr aprés Diên‑Biên‑Phu, ch’étoait in.ne décarsure (décarsure signifie ici déconvenue) éd trop. Il o tchitté l’Armerdre pour s’értrouvoér din l’Inseignemint. Os voéyez bien qu’a n’o point cangé, in.nhui (in.nhui signifie aujourd’hui) o z-imbeuche chés inseignants édsu l’Bon Coin, n’importé tchéche (tchéche signifie qui) , quoé !…

Nous vlò don lò, à l’École des Métiers mi pi Ver Nuisant in face l’in.ne l’eute. Éj lis din ses ziux qu’il o les freux (les freux en français la frousse) . I magine, probabe (probabe signifie probablement) , qu’éj sus t-in.ne sorte d’inspecteur pi qu’éj vos li foaire poéyer tout ch’qu’i m’o foait indurer durant mes quate moés d’classes(**) [formation de base des nouvelles recrues (jargon militaire)] . Rien qu’dé l’vir conme cho bec et borne (bec et borne signifie interloqué, médusé) , éj pinse :
« Paure niacoés (niacoés signifie nigaud) , t’existes minme point ! »

Os rsortons, mi pi ch’Directeur, pour aller vir in.ne eute salle.

Éch baroumoaite,
pèr éch preume d’octobe 2023.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête (pétête signifie peut-être) !
Adé pi vnez nous rvir.