COÉRE ÉD Z‑HOTONS (hotons signifie ici vieux souvenirs)

Éch darin (darin signifie dernier) cœup, ch’étoait l’andimole (andimole signifie crêpe) du diabe qu’os avez pu intinde, mais ch’texe il étoait djò in plache édpu Mathiu Salé. In.nhui (In.nhui signifie aujourd’hui) , éj vos ai miton.né in.ne tchote (tchot, tchote signifient petit, petite) bricole qu’al date d’él minme époque. Mais qu’os n’trouvarez point neune pèrt. Ch’est ch’qué j’appeloais, n‑y o trente-sept ans d’cho, un conte à jter. Tout conme i y o des mouchoérs in papier qu’o put jter, j’avoais din m’cawette (cawette signifie tête) tchéques (tchéques signifie quelques) contes éq j’invintoais, fil à mesure, et pi qu’éj contoais in.ne foés, ou bin des foés deux, à chés séries (séries signifie soirées, veillées) avuc chés Diseux.

Chl’inregistrémint il est dsu l’minme cassette éq l’andimole, mais ch’texe i n’avoait janmoais té écrit. Adon éj m’y sus mis. Cha m’o prins quasimint in.ne ésmain.ne ! J’ai acouté, racouté, raracouté, in eugmintant ch’son à mort, in ralintichant l’vitesse tanq qu’j’ai pu. J’éroais dû foaire tout cho du temps qu’mes érelles i n’étoai'té point porrites à foait (à foait signifie complètement) . I resté tchéques bout d’phrases qu’éj nin sus point sûr, i nn est ch’qu’i nn est, pi vlò toute !

Ch’est in.ne histoére qu’a s’passe au tchinzienme siéque, du temps qu’él ville d’Albert a s’appeloait coére Ancre, vu qu’Conchino Conchini, éch Maréchal d’Ancre, i n’étoait minme point né, pi qu’sin nom i n’étoait point meudit pèr tous chés gins éd Picardie et pi d’eute pèrt. Albert ch’étoait ch’tchot nom du Duc éd Luynes, chti qu’il o escoffié (escoffié signifie tué, vient de escoffier) Conchini in plein mitan d’él cour du Louve, pi qu’i n’étoait don point né nan pu du temps d’émn histoére. Mais vlò qu’éj passe pèr Boves (passer pèr Boves signifie faire des digressions inter­minables) coére un cœup ! Éch conte, éch conte éd Jean.ne, il est in plache tout in bos d’ém « page perso (cliquez pour aller écouter)  », coére un cœup.

Éch baroumoaite,
pèr éch preume éd sectimbe 2023.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.