jé n’vourroais point vous bassiner…

N-y o point pu sourdiu qu’échti qu’i n’vut point intinde

Aprés quèrante-neu jours et pi troés heures à térinter (térinter signifie hésiter) , no Présidint il o don fini pèr trécoper (trécoper signifie traverser) l’rue. Sans pu s’biler d’chés rtraites à soéxante-quatre ans, él vlò don pèrti s’espadron.ner (s’espadron.ner signifie s’agiter) din l’bataille éd l’ieu. N-y o pourtant point quèrante-neu-troés solutions : n‑y o qu’à hanser (hanser signifie construire, installer) des bassines ! Et pi, tanq à foaire, mette pou szés warder tchéques miyers d’CRS qu’il impêqueront ch’SAMU d’évnir tcheur (tcheur verbe défectif, signifie chercher, quérir) chés blessés pour ész aconduire din chés hôpitals.

Combien d’ziux crévés mon (mon signifie chez) chés CRS, combien d’mains arrachées din chés forches éd l’orde ? Pi j’y pinse, lò… Est tchurieux tout d’minme, in dix-neu-chint-dix-sept, Aurélien min grand-pére, vu qu’il avoait passé quèrante ans pi deux éfants, il o té rtiré d’éch front d’chu Cmin des Dames pour t-ête nonmé gardien d’la paix à Pèris. Gardien d'la Paix avuc in.ne pélerine qu’i rouloait à mesure (à mesure signifie parfois) pour foaire – gintimint – cirtchuler chés gins quanq i llé falloait ! Achteure (Achteure signifie maintenant) ch’est des forches éd l’orde et pi biétôt des forches éd l’orde nouvieu qu’i vien'té lancher des lacrimaux, des LBD pi des grenades édsu chés gins. Ch’est l’progrés, qu’il éroait dit Aurélien.

Siq éj vous pèrle d’orde nouvieu, ch’est qu’avuc no brave – brav’M ? – Présidint, pour chés prochains votages, él porte al est tout gran.ne ouverte à ch’Front Rassimblémint Nation.nal. Élie (Élie signifie élue, vient de élire) drés ch’premier tour qu’al s’in vo t-ête, Marine ! À tchéche (tchéche signifie qui) qu’al pourro dire merci ?

(merci à Riss)

Merci à un Présidint qu’il o té éli avuc 18 768 639 voéx dsu 48 752 339 inscrits – pi lò-ndin, combien qu’il ont voté point pour li mais surtoute conte Marine ? –, ch’est minme point trente-neuf du chint (chint signifie cent)  ! Ch’est bien à li d’pèrler d’démocratie quanq soéxante-dix Français dsur chint i sont conte és réforme. Wate (Wate signifie qu’im­porte) , i n’s‘in rtorné point d’puss éq d’in.ne mouque à brin (brin c’est merde et mouque c’est mouche)  ! Vlò ch’qu’il est capabe éd réponde :
« Est-ce que ça veut pour autant dire que la République doit s’arrêter ? »

Os êtes tertous duits (duits signifie habitués) à ch’qu’éj foaiche (foaiche signifie fasse, vient de foaire) des niches éch preume d’avri, bé in.nhui (in.nhui signifie aujourd’hui) , ch’est vous-eutes qu’éj vous invite à nin foaire in.ne, éd niche. Siq os êtes assez niacoés (niacoés signifie niais) pour aller mette un tchot (tchot signifie petit) bout d’papier din in.ne urne à vo mairrie, l’jour éd votage pour chés députés, éch jour‑lò os vous ramintuvrez (ramintuvrez signifie souviendrez, vient de ramintuvoér) d’éch qu’il o foait vo candidat à l’heure d’éch quèrante-neu-troés. Ch’est sro l’occasion d’invoéyer à l’oust (à l’oust signifie au diable) tous chetlò (chetlò signifie ceux) qu’il ont té d’avis qu’os pouvoète ouvrer (ouvrer signifie œuvrer, travailler) dusqu’à soéxante-quatre ans.

Éch baroumoaite,
pèr éch preume d’avri 2023.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.