quoé qu’ch’est qu’i nous attind ?

Pump track... à Épagne-Épagnette
(ch’Jornal d’Adville d’éch 09/02/23)

Quanq j’ai yeu li l’nouvelle, éj m’ai nman.né (nman.né signifie demandé, vient de nman.ner) quoé qu’ch’n’étoait qu’in.ne pump trac. In preume (In preume signifie d’abord) , ch’est‑ti un ou in.ne ? Cha sroait‑ti in.ne veudoése (in.ne veudoése est un tourbillon) du diabe, in.ne seurte d’ouragan, conme i n‑y in o din chés Amériques ? Éj m’ai dit : i feuro qu’j’énman.ne à chés Épagnols ou à chés Épagnolettoés qu’éj con.noais quoé qu’cha put bien t-ête qu’in.ne pompe à trac ?

Mais vlò‑ti point éq tchéques (tchéques signifie quelques) jours pèr aprés, j’ai foait un drôle éd reuve, j’ai reuvé qu’à Ferriéres nous étou (étou signifie aussi) os alloème avoér in.ne pompe à trac. Cha sroait don tchéque cose qu’o cmande (cmande signifie commande, vient de cmander) et pi qu’o z‑acate (qu’o z-acate signifie qu’on achète, vient de aca­ter) … Pi ch’est‑ti qu’din min reuve, éch nouvieu conseil éd conmune i bougeroait un molé (un molé signifie un peu) ses fesses ?

Est vrai qu’il ont rudemint bien crititché Billot durant qu’il étoait maire. D’éch temps‑lò, eux-z‑eutes il étoai'te à glicher din nos boétes à lettes des mots d’billet d’un soé‑disant warde-mahons (un warde-mahons est un garde champêtre, les mahons sont des coquelicots) . Achteure (Achteure signifie maintenant) qu’il ont prins s’plache, i n’ont point foait grand cose éd rère… Ah sié ! Il ont cangé l’date d’él fête ! Ch’étoait in.ne cope (in.ne cope signifie une paire) éd moés pèr aprés chés votages. Édpu ch’temps‑lò, réïus (réïus signifie lassés) , ércrans (ércrans signifie fatigués) , flapis (flapis signifie épuisés) pi abolis (abolis signifie exténués) pèr leu z‑ouvrage, il ont foait in.ne tchote (tchot, tchote en français petit, petite) pause… in.ne pause qu’al dure édpu biétôt troés ans.

Mais din min reuve, toute i s’in alloait canger, éch conseil éd conmune il alloait acater in.ne pompe à trac. Pi j’ai comprins. Achteure ch’mot informations i raptchotit (raptchotit signifie rapetisse, vient de raptchotir) in infos, chés applications i ratinche'te (ratinche'te signifie diminuent, vient de ratincher) in applis, chés classes prépèratoéres à chés gran.nes écoles il ont té raccourchies in prépas, à quoé qu’i vont nn ête biétôt réduits chés conseillers d’conmune ? Adon, pour nin définir, j’ai idée qu’ch’est in.ne pompe à tracteur qu’os allons avoér, in.ne seurte d’ingin pour aho­tcher (ahotcher signifie accrocher) à ch’tchul d’éch tracteur éd nos imploéyés d’conmune, in.ne éspéce d’otieu (otieu signifie outil) pour décraper (décraper signifie décrasser) chés couillous (couillous signifie caniveaux) et pi net­tier (nettier signifie nettoyer) l’mère-à-chu-rio (l’mère-à-chu-rio c’est la mare au rio, lieu-dit) .

Mais i feut s’déméfier (s’déméfier signifie se méfier) d’chés reuves. Tout l’mon.ne i llé sait bien. Fuche (Fuche interjection, signifie qu’importe) , os voérons bien ch’qu’i nin sro !… In attendir éj m’in vos tout d’minme énman.ner à min tchot-fiu. Li qu’il est toudi (toudi signifie chaque jour) à varon.ner (varon.ner signifie flâner, traîner) édsu des fesses-bouc, des toui-toér pi in route à rbéyer (rbéyer signifie regarder) des fraiques-gniouses tout l’long du jour, i s’in vo pétête (pétête signifie peut-être) pouvoér m’asplitcher (asplitcher signifie expliquer) quoé qu’ché nn est qu’in.ne pompe à trac.

Éch baroumoaite,
pèr éch seize éd février 2023.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête !
Adé pi vnez nous rvir.