tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

chés HOCLEUX (hocleux signifie incapables) il ont foait fort

Hier j’ai rchu un message d’Orange –Orange ch’est min F.A.I. conme i di'te–, i m’racontoai'té conme cho qu’os alloème biétôt avoér la fibre. Feut dire qu’os sonmes sûremint chés darins (darins signifie derniers) in France à t‑ête coére (coére signifie encore) avuc un ADSL éd brin. N‑y avoait, din leu courrier, in.ne case à clitcher pour aller vir un molé (un molé signifie un peu) pu z‑avant et pi coésir éch qu’o vut, ch’diaméte d’éch tuyeu, probabe (probabe signifie ici proba­blement) :

(qué bieu pipion qué vlò-lò !)

Éj clique édsu pi vlò ch’qu’éj voés din min navigateur –j’ai oblié cmint (cmint signifie comment) qu’di'té chés Canadiens, un butineu, un fouineu?– din in.ne page badjée (badjée signifie remplie, vient de badjer) d’tchots dessins bitaclés (bitaclés signifie bariolés) :

(heureusemint qu’i n‑y o un parachute, pasqu’o tchait d’rudemint heut !)

Ch’est coére des coses qu’i peu'te arriver; person.ne i n’est pèrfoait. Cho, ch’étoait hier d’érmontée (d’érmontée signifie après-midi) ; au matin, à pein.ne élvé, j’érclique un cœup, minme tchestion minme punition: tours (tours signifie toujours) él minme message, mon (mon signifie chez) Orange i sont tours aussitant désolés! I n’leu z‑ont point aperchu d’éch problinme, i feut qu’jé szés prévienche. J’értorne don vir éd pu prés ch’message érchu hier, pi lò j’déteupe (déteupe signifie découvre, vient de déteuper) , tout in heut, un tchot pipion (pipion signifie bouton) doù qu’o put leu réponde:

(éch pipion i n’est point granmint gros, mais il est bien lò !)

Jé n’foais ni in.ne ni deuze, éj leu réponds in leu z‑invoéyant chés deux images qu’os avez pu vir pèr au-dsu, tout in leu z‑asplitchant qu’éj n’arrive point à vir leus fanmeuses offes. Éj n’ai point attindu l’réponse granmint (granmint signifie beaucoup, très) longtemps. Moins d’chonq minutes pèr aprés, éch message il avoait tcheu (tcheu signifie chu, vient de tchair) din m’boéte à lettes; él vlò, tout cœuché vêtu (cœuché vêtu signifie ici brut de décoffrage) :

Bonjour,
Vous venez de répondre à un message d’Orange sur l’adresse :
noreply-orange@infos.orange.fr
Cette boite aux lettres ne nous permet pas de traiter votre demande.
En vous remerciant,
L’équipe Orange

Él boéte pour leu réponde ch’est don in.ne adréche noreply, conme cho i n’sont point pèr trop souvint déringés. Ch’est vraimint des boins, mon Orange! Lò ch’est ch’coq (ch’coq signifie le comble) , ch’est l’pastorelle (l’pastorelle signifie l’apothéose) , chés nom des eus‑lò il ont coére gaingné ch’pompon!

Heureusemint, i n’y o point qu’des hocleux din la vie. Min tchot-nveu, qu’il est étudiant in deuxienme énnée d’I.U.T., pour foaire ses preufes il o dû, avuc deux eutes copains, hanser (hanser signifie élaborer) in.ne nouvieuté. Il ont coési d’foaire d’él biére. Il ont don traité avuc un brasseu pour qu'i leu nnin fabrique mille lites. Mais surtoute i falloait szés vinde, chés mille lites éd biére‑lò…

In moins d’érien ch’cœup l’o té foait pi bien foait: un bieu (bieu signifie beau) tchot site intèrnéte, un site doù qu’o put cmander (cman­der signifie commander) et pi poéyer l’biére avuc in.ne carte bantchaire ou bin coére pèr Paypal. Os pouvez y aller vir, a n’est point conme Orange, n’y o point d’message d’erreur, os n’avez qu’à clitcher dsu ll’image lò in-dsous pi os y êtes direc:

un clic a n’coute é‑rien, allez don vir !

Acatez-leu (Acatez-leu signifie achetez-leur, vient de acater) don tchéques (tchéques signifie quelques) boutelles d’Ölrun –ch’est conme cho qu’il ont dénonmé leu biére–, pi os voérez, os n’êtes point mon Orange, vo conmande al sro foaite rondébilis (rondébilis signifie rapidement) pi cha n’beugue point!

Éch baroumoaite,
pèr éch preume éd déchimbe 2022.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 16/12/2022 Tchuin d’ziu du 16/11/2022