tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

a finiro qu’il éront m’pieu

Vlò quoé qu’ch’est qu’éch facteur il o mis din no boéte à lettes hier au matin; conme os pouvez l’vir, ch’est in.ne lette du troés d’novimbe et pi al est arrivée l’tchinze, vite foait bien foait:

(Os voéyez qu’ch’est point des mintiries !)

Un tchot molé (un molé signifie un peu et tchot c’est petit ) pu bos, o put lire:

dernière relance : en l’absence de régularisation rapide de votre situation, le caractère obligatoire de cette demande nous imposerait de suspendre vos accès à la Banque en Ligne et vos opérations (virements, etc.)

Ch’qu’i vut dire, est clair, éq jé n’pourrai pu rien foaire d’émn èrgint, al restero din chés mains d’chés banksters. J’étoais djò rpéré, rapport (rapport que signifie parce que) qu’éj n’avoais point d’téléphon.ne portabe, in.nhui (in.nhui signifie aujourd’hui) , nin vlò d’in.ne eute : ch’est m’carte d’idintité qu’a n’est point d’étcherre (d’étcherre signifie ici conforme) . A n’foait point l’affoaire, vu qu’al date éd dix-neu chint quatré-vingt-sept.

Quoé qu’ch’est qu’o voulez don, Monsieu ch’Facteur-Chef? Cho foait pu d’soéxante-dix ans qu’os vous otchupez d’mes sous, tout in foaisant vo beurre avuc, a n’vous assuffit don point? Feute d’un méchant bout d’carton ércouvert in plastique, os allez don m’condan.ner à moérir éd faim? Ch’est cho qu’os voulez? Soin (Soin inter­jection signifiant Attention) à vous! siq éj défuncte (défuncte signifie décède, vient de défuncter) os n’érchuvrez pu m’pinsion pour vous foaire des rintes avuc.

Tout cho cha m’foait pinser à l’armerdre. J’ai con.nu cho durant deux énnées: «Jé n’vux vir qu’in.ne seule tête!» Falloait point un poéille (poéille signifie poil) qu’i dépasse, éq person.ne éne fuche (fuche signifie soit, vient du verbe ête) eutrémint qu’ész eutes. Pi vlò qu’cha continue, mé vlò rnu (rnu signifie revenu, vient de rnir) pu d’soéxante ans in arriére. A nin finiro don janmoais, cré nom des boés!

À forche (À forche signifie en désespoir de cause) , j’ém dis qu’pétête (pétête signifie peut-être) i n’oseront point?… Os voérons bien ch’qu’i nin sro, j’m’in vos foaire conme chés Ingliches: «wate in t’zi».

Éch baroumoaite,
pèr éch seize éd novimbe 2022.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête !
Adé pi vnez nous rvir.

 


Tchuin d’ziu du 01/12/2022 Tchuin d’ziu du 01/11/2022