tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

rindez-mé min Biloute!

Tout cho ch’est d’él feute à ch’Phonse, os savez bien, Alphonse Pasquier, né natif éd Çrisin-Gaillin. Éj trachoais (trachoais signifie cherchais, vient de tracher) «éch soupirant», pi j’ai bien récoué (récoué signifie récupéré, vient de récouer) in.ne vèriure (vèriure signifie version) éq Meurice Hoël i m’avoait don.né, mais j’nin trachoais in.ne eute, qu’al étoait dsu un trente-troés tours éd l’Office Tchulturel d’Anmiens. A s’appeloait «du Théiate… des canchons et pis coère dé l’Poésie». Impossibe dé ll’értrouvoér. J’étoais pourtant çartain dé ll’avoér limérisé (limérisé signifie numérisé, vient de limériser) . A n’foait mie rien, éj vos aller rtcheur (rtcheur signifie rechercher, verbe défectif) éch disque –Tchotchote al éroait dit «l’plaque»–, éj monte din ch’guernier… Rien!
(disque Promophone PROM20)

L’o follu qu’jé rtorne chés chonq (chonq signifie cinq) tchaisses in carton d’cubi édvant d’déteuper (déteuper signifie trouver) l’fameuse plaque. Du cœup j’ai yeu l’idée d’érmette min nez din tout ch’bazèr qu’i n-y o din chés tchaisses éd 33 tours éd picard pi dsu min disqué dur, badjé (badjé signifie rempli, vient de badjer) d’picard li étou (étou signifie aussi) . J’avoais l’invie –un pécavi (un pécavi c’est une lubie) , conme cho– d’ércmincher (ércmincher signifie recommencer) à limériser tous chés trente-troés tours picards éq j’avoais. Des trente-troés tours tertous acatés (acatés signifie achetés, vient de acater) din des réderies.

Ch’est conme cho qu’éj m’ai aperchu qu’i m’mantchoait un disque d’Henri Leblond, Biloute éd sin surpitchet (surpitchet signifie surnom) . J’ai rtorné vir (vir signifie voir) din mes tchaisses à cubi pi minme din chetlò qu’i n-y o point d’picard: chés 78 tours acatés mon (mon signifie chez) Mame Caron, plache René Goblet, éd quanq j’étoais au lycée, pi coére (coére signifie encore) chés microsillons d’Armstrong et pi d’Sydney Bechet poéyés pu tchér éq du poéve, durant qu’j’étoais étudiant… Érien. J’ai récminché troés foés, tours (tours signifie toujours) érien!
él vlò ch’Biloute ! (disque Déesse DDLX 117)

Stapindant (Stapindant signifie pourtant) , éch disque-lò jé ll’avoais, étoait mèrtché din min canepin pour chés réderies, j’avoais minme noté l’référinche: un disque Déesse DDLX 117. Asseuré qu’i dvroait t-ête à no moaison. J’ai fini pèr comprinde, ch’est tchéqu’un qu’i mé ll’o dérouflé (dérouflé signifie volé, vient de déroufler) ! Alorss, éj lanche in.ne boutelle din ll’arnitoéle (l’arnitoéle sens fig. : internet, sens propre : toile d’araignée) : qu’échti qu’i mé ll’o prins i veuche (veuche signifie veuille, vient de vouloér) bien mé l’rinvoéyer, minme in port dû, jé n’porterai point plainte, mais j’vous in supplie à deux genoux, rindez-mé min Biloute!

Éch baroumoaite,
pèr éch seize d’octobe 2022.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 01/11/2022 Tchuin d’ziu du 01/10/2022