pour in.ne égville

(égville à botteler) Jeudi passé, su l’cœup d’dix heures, ém tchote (tchot, tchote signifient petit, petite) sœur al est vnue boère sin tchot café, conme al lé foait tous les lundis pi tous les jeudis. Al avoait apporté un morcieu d’bos qu’al avoait rtrouvé din sin guernier, pi a m’o nmandé quoé qu’ch’est qu’ch’étoait. J’i ai répondu : in.ne égville (égville signifie cheville) à botteler, cha servoait din l’temps à foaire des bottes éd feurre (feurre signifie paille) durant l’moédeut (moédeut signifie moisson) . Ch’étoait pèrti, j’étoais lanché din mes ratros (ratros signifie radotages) . Stapindant (Stapindant signifie cependant) , al lé sait bien qu’i n’feut point m’poser d’tchestion conme cho. J’m’ai don mis à li asplitcher l’moédeut in dix-neu-chint (chint signifie cent) .

Din chés camps i n-y o in.ne gron.née (gron.née signifie multitude) d’gins in route à ouvrer. Os avez in preume chés feutcheux avuc leu dèrds (dèrds signifie faux) . I sont lò in.ne dizain.ne. Driére chaque feutcheu i n’y o chl’in.nhouveleu (in.nhouveleu, euse signifie javeleur, euse) , éq ch’est souvint in.ne in.nhouveleuse. Al sont lò pour mette chés blés copés in tchots tas bien rédjuliers qu’o z-appéle des houvieux (un houvieu en français une javelle) . Pi vlò in.ne troésienme fenme qu’al suit avuc ésn égville, qu’o dénonme étou (étou signifie aussi) un in.nhouvloér ; al s’in vo prinde deux d’chés tchots monts (monts signifie tas) d’feurre et pi les loéyer (loéyer signifie lier) bien conme i feut insen.ne (insen.ne signifie ensemble) pour nin foaire in.ne botte. Pi quanq al o loéyé in dizain.ne éd bottes al s’in vo n’in prin.ne neuf qu’al met dbout l’in.ne conte l’eute, pi l’dixienme al s’in vo n’in foaire éch capieu (capieu signifie chapeau) pour mette pa dsu sz eutes, chés épis pèr in bos. Éch dizieu (un dizieu c’est un tas de dix gerbes) l’est foait, éch grain i s’in vo finir éd meurir sur plache. Pu tèrd o l’rintréro pour él batte au fléyeu (fléyeu signifie fléau) .

Éj mé nmande bien cmint (cmint signifie comment) qu’a s’passoait du temps d’Toutânkhamon ; ch’étoait point in.ne dèrd, ch’étoait in.ne feuchille, mais ll’égville al existoait djò. Chés archéologues il ont minme déteupé (déteupé signifie découvert, vient de déteuper) dz égvilles mon (mon signifie chez) d’chés Cromagnons ; chetlò (chetlò signifie ceux-là) il ont don un chint d’siéques d’existence. Jé n’sais point cmint qu’al étoait foaite leu gville et pi quoé qu’ch’est qu’i botteloai'té avuc, mais il avoai'té djò ch’qu’i feut !

In.nhui (In.nhui signifie aujourd’hui) , pu d’feuchille, pu d’dèrd, pu d’houvieu pi pu d’égville, o z-o invoéyé tout cho à l’oust (à l’oust signifie au diable) . Rimplachés pèr chés moésses-battes, pi in moins d’un siéque, coére (coére signifie encore)  ! Éq ch’est-ti bieu (bieu signifie beau) l’progrés ! Quanq o z-y rbée (rbée signifie regarde, vient de rbéyer) d’un tchot molé (un molé signifie un peu et un tchot molé c’est un petit peu) pu prés, o s’aperchut qu’éch progrés, o llé dvons quasimint à troés gins : Denis Papin, Michael Faraday et pi Albert Einstein. Éch preume pour él machine à vapeur, éch deuze pour éch moteur alectrique et pi ch’darin (darin signifie dernier) pour l’énergie atonmique. Ch’est point forchémint leu feute, mais ch’est rapport à (rapport à signifie à cause de) chés troés-lò éq toute il o cminché (cminché signifie commencé, vient de cmincher) à s’détratcher.

(chés in.nhouvleuses in route à foaire des gron.nées d’dizieux)

Achteure (Achteure signifie maintenant) , os ons dit adé (adé signifie adieu) à l’lutte des classes pi à l’cause du peupe. I sont fin loin chés fédérés d’la Conmune éd dix-huit chint soéxante-et-onze, chés vignérons révoltés d’dix-neu chint sept, chés grévisses conte él djerre colon.niale éd dix-neu chint vingt-chonq (chonq signifie cinq) , éch Front Populaire éd trente-six. In.nhui, él terre al est badjée (badjée signifie remplie, vient de badjer) d’consonmateurs. I n-y o pu qu’cho, des consonmateurs qu’i maque'te (maque'te signifie bâfrent, vient de matcher) in moins d’six moés ch’qué l’planéte al produit durant in.ne énnée. Est tchurieux cmint qu’él mawaiseté (mawaiseté signifie perversité) d’chés honmes al put canger in.ne invintion boin.ne pour tout l’mon.ne in décarsure (décarsure signifie catastrophe) fatale pour tout l’planéte !…

D’autchuns (D’autchuns signifie certains) i di'te éq no société al s’in vo droét din ch’mur. Quanq j’intinds dire cho, éd vrai (éd vrai signifie vraiment) , mi vlò ch’qué j’ai putôt l’invie d’leu réponde : i n’est pu temps d’freiner, vu qu’os y sonmes édjò, din ch’mur.

Éch baroumoaite,
pèr éch preume d’octobe 2022.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête (pétête signifie peut-être) !
Adé pi vnez nous rvir.