tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

tertous perdants

Adon no Manu il o perdu. Perdu és majorité à l’chambe éd chés députés. Mais i n’est point tout seu à avoér perdu. Siq os avez un tchot (tchot signifie petit) momint, os aller vir éch qu’i nn est. À ch’deuxienme tour éd chés législatives o votoait pour chonq chint soéxante douze plaches éd députés. Os allons rbéyer (rbéyer signifie regarder) insen.ne chés résultats d’un molé pu prés.

In tête ch’est Ensemble éch pèrti d’no Présidint avuc 244 élis pèr 38,57% d’chés bulletins. Il ont perdu des plaches, il éroai'te pu nin perde coére (coére signifie encore) éd puss: 38,57% éd 572 plaches cho n’foait point 244 cha foait tasseulemint 221.

In deuze arrive éch Nupes à Melinchon. Il ont 127 postes grâce à 31,60% d’chés voéx, mais 31,60% éd 572 cha foait 181. Éch systinme il leu z-o prind 56 siéges. Minme la Marine qu’a s’foait avoér: avuc 17,30% al o 89 députés mais 17,30% éd 572 cho foait 99. Les républicains, eux-eutes i n’sont point loin d’éch pèrti à Macron, du cœup il ont 61 députés avu 6,98% d’chés voéx, mais 6,98% éd 572 cha n’foait qu’40.

Os voéyez conme cho qu’chés décopages éd circonscriptions i sont rudemint bien foaits. Bien foaits pour chetlò (chetlò signifie ceux) qu’il ont l’pouvoér. Et pi ch’n’est point d’in.nhui (in.nhui signifie aujourd’hui) ! éd sous la Chonquienme, ch’o tours (tours signifie toujours) té conme cho. Ch’est l’proportion.nelle à l’mode éd chés pu forts.

Éch grand gaingnant din tout cho ch’est ch’pèrti d’chés gins qu’il ont té à l’pêque. J’n’ai point té à l’pêque, mais j’nin sus d’éch pèrti d’chés abstintion.nisses. Édpu 1968, éj n’ai voté qu’in.ne foés, ch’étoait in 2002, à chés présidintielles. J’ai voté Chirac pour rétamer Le Pen (éch pére). J’ai té rmercié pèr Chirac qu’i o dit d’nous «Os sz’ons bien yeu». Ch’o té conme in.ne pitchure éd rappel.

O put s’édmander cmint (cmint signifie comment) qu’a s’foait qu’os sonmes sitant qu’cho à n’point nous déringer? Vlò ch’qu’éj nin pinse. Feut point croère éq ch’est pasqu’i s’in fout'te éq chés gins i n’vont point voter. Ch’est pasqu’i n’y croé'té pu. Maginez in molé. Os avez din les trente ans pi deux éfants. O vous annonche él fin du mon.ne pour din dix ans. Rapport (Rapport à ch’ signifie à cause du) à ch’récœuffemint climatique. Pi os allez croère qu’in allant voter cha vo y canger tchéque cose? Os savez bien qu’chetlò qu’i méne'te éch mon.ne, ch’est point chés gins qu’os allez élire, ch’est la Phynance à ch’pére Ubu!

Cha foait quasimint pu d’un siéque éq chés gins i sont duits (duits signifie conditionnés) à consonmer à ti à masse (à ti à masse signifie considé­rablement) . I feut rlancher l’consonmation. Os mingeons in six moés ch’qu’él planéte al put nous don.ner pèr an. Mais cha n’foait d’érien. Consonmez, consonmez! Chés capitalisses i leu z-in fout'té plein leu poche. Leus fouillousses (fouillousses signifie poches) i sont badjées (badjées à foait signifie remplies complè­tement) à foait, pi stapindant (stapindant signifie cependant) i leu nnin feut tours éd puss, tanq et pi coére!

Tout l’mon.ne il o les freux (les freux signifie la frousse) éd l’estricade (estricade signifie catastrophe) finale, mais person.ne éne pinse à canger rien à s’min.niére éd vive. Mi in preume, bié seur. Reiser il avoait bien raison: «Os vivons in.ne époque formidabe!»

Éch baroumoaite,
pèr éch preume éd juhiet 2022.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 16/07/2022 Tchuin d’ziu du 16/06/2022