tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

joéyeux Noël

Joséphine qu’al vient d’rintrer à ch’Pantaléon, al cantoait «j’ai deux anmours…», éj mé nman.ne siq in.nhui (in.nhui signifie aujourd'hui) os n’édvroème point canter «j’ai deux Zemmour…»? Mais pu qu’j’y pinse, éq j’y rapinse pi qu’éj pourpinse (pourpinse signifie réfléchis, vient de pour­pin­ser) , j’ém dis qu’avuc un Zemmour tout seu os nn avons bien d’assez, vu qu’il o tellemint d’forche et pi tellemint d’gingin (gingin signifie talent) qu’i séro bien, à li tout seu, seuver La Fraaaance!

Mitterand il avoait foait d’ses pieds d’ses mains pour éq Jean-Mèrie Le Pen i vienche prinde des voéx à chés pèrtis d’droéte. No Manu nation.nal i n’o yeu rien à foaire, point dzoin d’bouger in.ne patte. Est tcheu (tcheu signifie tombé, vient de tchair) tout rôti din sin bec: Éric Zemmour d’Arc il est lò qu’i s’présinte à chés votages. Conme cho, troés candidats à droéte pi in.ne gron.née (gron.née signifie pléthore) à gueuche, éch présidint d’chés riches i s’in vo pouvoér érpasser bail pour chonq (chonq signifie cinq) ans. In moins d’deux pi, pétête (pétête signifie peut-être) minme, in moins d’deux tours. In tous les cas, in deux cœups d’tchuillére à pot.

Hier au soér no Présidint –qu’i n’est tours (tours signifie toujours) point candidat– i s’est foait, durant deux boin.nes heures, des complimints à li-minme édsu sin quinquennat. Est vrai qu’il o réussi à démasingler (démasingler signifie déglinguer) ch’qu’os avoème pétête éd pu bieu din no poéyis: éch service public. O z-imbeuche achteure (achteure signifie maintenant) des cadoreux (cadoreux signifie policiers) qu’i n’ont point leu certificat d’études. Chés maristers mantchants i n’peu'té point t-ête rimplachés feute éd gins capabes. Chés proviseurs i nin sont à passer dz annonches édsu ch’boin tchuin pour nin trouvoér. Chés juges il étoai'té hier din chés rues pour dire qu’i nin peu'té pu, éq feute d’èrgint il ont troés ans d’travail in rtèrd. Tanq à chés hôpitals, os savez ch’qu’i nn est, chés person.nels échuchés (échuchés signifie épuisés, vient de échu­cher) , leu travail mal poéyé ou point poéyé du toute et pi ch’coq (ch’coq signifie le comble) , chés lits qu’no gouvernémint i continue à freumer à ti à masse (à ti à masse signifie en abondance) . Jé n’pèrlerai point d’él souffrance éd chés gins, et pi d’tous chetlò qu’i leus ont défoait (qu’i leus ont défoait signifie qui se sont suicidés, vient de s’défoaire) .

Alorss, os ll’avez comprins él campaingne al est aroutée (aroutée signifie engagée, vient de arou­ter) , no Présidint il est in route à ca­ba­ler (ca­ba­ler signifie mener campagne) . Dusqu’à chés votages, li pi ses boins copains i s’in vont don coére (coére signifie encore) nous mintir in molé (in molé signifie un peu) puss qu’édvant. Durant quate moés os allons nn intinde, pi des rudes! Boin courage et pi joéyeux Noël à tertous.

Éch baroumoaite,
pèr éch seize éd déchimbe 2021.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête !
Adé pi vnez nous rvir.

 


Tchuin d’ziu du 01/01/2022 Tchuin d’ziu du 01/12/2021