tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

foais du bien à un beudet…

Foais du bien à un beudet, i t’rindro des pets.  (dicton picard)

Alan Turing ch’est un Ingliche, né in dix-neu chint douze à Londes, pi mort in dix-neu chint chinquante-quate à Wilmslow point bien loin d’Manchester. Rapport à quoé (Rapport à quoé signifie pour quelle raison) qu’éj vux vous pèrler d’li? Allez savoér, éj né l’sais point mi-minme. Pétête (Pétête signifie peut-être) pasqué ch’étoait un moaîte in logique mathématique et pi qu’ch’est din ch’donmain.ne lò qu’éj travailloais?

Turing i cminche (cminche signifie commence, vient de cmincher) à t-ête con.nu in dix-neu chint trente-six, pèr un artique adoù qu’il invintion.ne in.ne sorte d’automate, tchéqu’un (ou tchéque cose) qu’il applique des régues, toudi les minmes, et pi sans pu réfléchir. O put maginer qu’ch’est un honme –i n-y in o des conme cho, pi granmint (granmint signifie beaucoup) coére–, ou bin qu’ch’est in.ne machine… Tout cho ch’est écrit din sin papier, pi cha reste édsu du papier. Pèr aprés i passe és thése pi i s’in vo ouvrer à Princeton dusqu’à la djerre, tours (tours signifie toujours) din l’minme branque.

Durant la djerre i s’in vo s’értrouvoér din in.ne étchipe qu’al trache (trache signifie cherche, vient de tracher) à détouiller chés messages allemands. Des messages qu’il ont té touillés pèr in.ne mécanique qu’a s’dénonme Enigma. Ch’code i cange tous les jours et pi des codes i n-y in o pu d’chint chinquante-neu miyards éd miyards. Alorss, Turing i s’in vo à sin tour foaire in.ne machine, in.ne vraie ch’cœup-lò, pour détouiller tout cho. Aprés bien des décarsures (décarsures signifie ici déconvenues) , cha s’in vo finir pèr mèrcher. Chés messages éscrets allemands i n’éront pu rien d’éscret pour chés Inglais. Tout cho ch’est à muche-tin-pot (à muche-tin-pot signifie en cachette) , bié seur, et pi o n’él séro qu’bien pu tèrd, din les énnées soéxante-dix.

Aprés la djerre, Alan i s’in vo interprinde d’han­ser (hanser signifie construire) sin premier ordinateur. Él machine qu’il o maginée in 1936 al s’in vo don vraimint exister, pi al vo révolution.ner ch’mon.ne intier. Pèr aprés i vo s’mette à l’interligince artificielle, i fro minme él pèri qu’d’ichi chinquante ans o n’pourro pu foaire éd différinche intré l’réponse d’un honme et pi chetlò d’un ordinateur à tous les tchestions qu’o pourroait leu poser.

In dix-neu chint chinquante-deux, ch’est l’estricade (estricade signifie catastrophe) , Turing il est atchusé éd t-ête homosexuel. Chés juges i li dmande'te éd coésir (coésir signifie choisir) intré deux énnées d’prison ou bin d’és foaire catrer chimiquemint. Ch’est conme cho qu’chés beudets d’éch gouvernémint inglais i ll’érmercie'te éd tout chl’ouvrage qu’il o foait durant la djerre. I n’iro point in prison, mais du cœup i s’in vo t-ête démasinglé (démasinglé signifie détruit, vient de démasingler) pi aboli à foait (à foait signifie entièrement) pèr chés drogues qu’il est obligé d’incorser (incorser signifie ingurgiter) . Ch’est conme cho qu’deux ans pèr aprés i s’in vo s’défoaire (s’défoaire signifie se suicider) in crotchant in.ne pinme avuc du cyanure énedin. Ch’étoait-ti un tchuin d’ziu (tchuin d’ziu signifie clin d’œil) à Blanche-Neige?

Tours est-ti éq sans chl’ouvrage d’éch t-honme-lò, os intindroème pétête coére chés bottes nazies clatcher dsu ch’pavé d’nos rues. Pi d’autchuns (d’autchuns signifie certains) i nin sroai'té fin contints, népoint (népoint signifie n’est-ce pas) Zemmour?

Éch baroumoaite,
pèr éch preume éd novimbe 2021.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête !
Adé pi vnez nous rvir.

 


Tchuin d’ziu du 16/11/2021 Tchuin d’ziu du 16/10/2021