tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

IL O-TI BIEN COÉSI (coési signifie choisi, vient de coésir) ?

N-y o tchéques (tchéques signifie quelques) jours éd cho, Xavier Bertrand il étoait din chés rues d’Anmiens avuc chés cacheux (cacheux signifie chasseurs) . In route à manifester rapport à chés interdictions d’cache. Bié seur, i n’étoait point lò conme présidint d’région, mais bien putôt conme candidat à chés votages éd 2022. Il étoait lò qu’i cabaloait (cabaloait signifie menait campagne, vient de cabaler) .

(ch’qu’o pouvoait vir din ch’défilé") Mais soin (soin ! inter­jection signifiant attention !) min camérade! Os n’sonmes pu din ch’boin viu temps! Ch’temps doù qu’ Pêche Nature et Tradition i foaisoai'te vingt-sept du chint (chint signifie cent) à chés votages din la Sonme. Il est passé ch’temps-lò. Éch temps qu’o pouvoait dire qu’éch droét d’cache ch’étoait un atchis d’no Révolution éd 1789. Chés coses il ont cangé, pi point qu’un molé (un molé signifie un peu) ! Mes gins, os allez vous nnin rinde compte point pu tèrd éq tout d’suite.

I n’est qu’éd lire un sondage foait pèr IPSOS/LPO. Chés cacheux, éd deux miyons troés chint mille qu’il étoai'te in 1984, i sont in.nhui (in.nhui signifie aujourd’hui) rdeschindus au dsous d’un miyon. Pour éch qu’i nn est d’él ruralité, i n-y o sept chint mille cacheux din chés villes pour quate mille cacheux-tchultivateurs. Tanq (Tanq signifie quant) à chés fenmes i sont moins d’chon (chon ou chonq en français cinq) mille à cacher. I feut-ti qu’éj vous diche coére (coére signifie encore) qu’i y o pu d’quèrante-chonq miyons d’inscrits dsu chés listes éd votages?

Bertrand et Schraen vu par Goutal Un eute sondage, foait pèr l’IFOP, i nous dit qu’i n-y o quatré-vingt-onze du chint d’gins qu’i n’ont janmoais caché. I dit coére éq soéxante-et-onze du chint d’chés gins il ont les freux (avoér les freux signifie avoir la frousse) d’aller din chés camps durant qu’o z-y cache. Et pi, pour nin définir, o trouve étou (étou signifie aussi) chinquante-quate du chint d’gins qu’i sont pour qu’o z-interdiche él cache él diminche.

Alorss, min paure Bertrand, t’es lò qu’tu reuves! Siq t’arrives à récouer (récouer signifie récupérer) tchéques méchantes voéx avuc chés cacheux à l’glu, combien qu’ch’est-ti qu’tu t’in vos nin perde, éd pèr l’eute bord? J’ai din l’idée, min camèrade, éq t’os point bien coési…

Éch baroumoaite,
pèr éch preume d’octobe 2021.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 16/10/2021 Tchuin d’ziu du 16/09/2021