tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

il ont foait fort!

Cha foaisoait pu d’quatore moés qu’éj guérinoais (guérinoais signifie m’impatientais, vient de gué­ri­ner) . J’attindoais qu’éch nouvieu conseil éd conmune i foaiche (foaiche signifie fasse, vient de foaire) esploser s’bombe. Pasqu’i falloait s’y attinde. Élis à ch’premier tour avuc tertous pu d’soéxante pour chint d’chés voéx, pi avuc moins d’trente-et-un pour chint d’abstintions, él nouvelle étchipe a n’avoait janmoais dévoélé sin progranme.

Éj sintoais bien qu’i prépèroai'te un grand cœup. Aprés avoér crititché durant pu d’dix ans éll’étchipe sortante, édpu chés votages, chés nouvieux élis i n’avoai'té tasseulemint point foait eute cose qu’éd foaire abatte tchéques (tchéques signifie quelques) abes chintenaires et pi dé szés rimplacher pèr troés tchots (tchot, tchote signifie petit, petite) pieds d’myosotis. Mais jé l’sintoais vnir, os n’perdoème rien pour attinde, os alloème vir ch’qu’o alloème vir!

Jé nn’ai-ti passé du temps à maginer quoé qu’ch’est qu’cha sroait qu’il alloai'te invintion.ner. Cha sroait-ti la fibe qu’al arriveroait pu tôt qu’prévu? A n’sroait point d’trop tôt, avuc chés fils éd téléphon.ne porris pour nous amner d’l’intèrnéte à tchotes srindjées (srindjées signifie seringuées) . À moins qu’a n’fuche éch tout-à-l’égout? Cha sroait bien étou (étou signifie aussi) , ch’tout-à-l’égout, a supprimeroait bien des imbernatries (imbernatries signifie emmerdements) , lò ch’est l’cas d’él dire!

Avuc min goutte-à-goutte d’intèrnéte, éj vos vir mon (mon signifie chez) intramuros chés nouvieutés édsu Ferriéres. Pasqué bié seur, éch site Ferriéres-80.fr ch’est passé d’mode. Éd tous sins (éd tous sins signifie de toutes façons) , n-y o pu rien qu’i vo, o clique édsu des liens qu’i n’méne'te neune pèrt (Page Not found…). Toute i s’in vo à l’berdandouille (aller à l’berdan­douille signifie partir à vau l’eau) . Adon j’attinds leu cœup d’Jarnac. Quanjou (Quanjou signifie quand est-ce) qu’il arrivero?
(ch’est l’indroét pi l’invers)

Eh bin hier au soér j’ai comprins! Bec et borne (Bec et borne signifie interloqué) éq j’étoais, pi j’él sus coére (coére signifie encore) ! J’ai déteupé (déteupé signifie trouvé, vient de dé­teu­per) din m’boéte à lette un mot d’billet d’éch conseil éd conmune. Probabe (ici Probabe est un adverbe signifiant sans doute) qu’il étoait din no boéte édjò dpu tchéques jours. Tours (Tours signifie toujours) est-ti éq j’ai apprins conme cho qu’no fête, qu’al o tours té ch’preume diminche d’octobe, al étoait finie dpu deux jours. Éll énnée-chi, no fête locale, conme i di'te, al avoait té avanchée d’pu d’un moés, achteure (achteure signifie maintenant) ch’étoait ch’vingt-huit et pi ch’vingt-neuf d’ahoute!

Ch’étoait cho, ch’cœup d’hernu (cœup d’hernu signifie coup de tonnerre) , pi un rude coére. Ch’étoait conme un cœup d’deux-cœups (un deux-cœups est un fusil de chasse à deux canons superposés ou juxtaposés) ! J’n’avoais mie yeu assez d’gingin (gingin signifie inventivité) pour maginer un cœup pèrel. Éj m’avoais bien foait rtcheusser (rtcheusser signifie mystifier, berner) , pi j’nin sus coére édsu l’tchul. Os avouerez avuc mi qu’no conseil éd conmune ch’est des rudes wépes (un wépe est une guêpe, au figuré un personnage astucieux,
expéri­menté
)
, pi minme des wépes à tchul ganne (à tchul ganne signifie mot à mot à cul jaune, un wépe à tchul ganne est une personnalité exceptionnelle) , coére!

Éch baroumoaite,
pèr éch preume éd sectimbe 2021.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 16/09/2021 Tchuin d’ziu du 16/08/2021