tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

in.ne réprochabe irrépublique

Cho, ch’étoait du temps d’Zikarsor(*) [Sarkozy, bié seur] , mais achteure (achteure signifie maintenant) n’y o point grand cose éd cangé, et pi minme, est dévnu puss pire! Vlò don ch’minisse éd la Justice qu’il s’értrouve édvant la Justice(**) [i n'est point tout seu, i n-y o chonq eutes minisses étou] . Cha n’foait dé rien, i reste à sin poste. I s’crampon.ne à sin cadot (cadot signifie fauteuil) d’minisse. Minme in prison, i restero minisse. Ch’est un serviteur éd la France pi surtoute éd tous chés Français. Éq ch’est-ti bieu in.ne dévotion pèrelle!

Ch’est point cho qu’i s’in vo ramner chés électeurs din chés burieux d’vote l’énnée tchi vient, nan! Jé n’vos point nin dire éd puss, mais tout d’minme, no Présidint i nn o réussi in.ne belle: mette din chés rues côte-côte chés estrêmisses éd droéte et pi chés gauchisses, chés intégrisses in soutène et pi chés anarchisses avuc un coutieu intré leus dints, tertous in route à djeuler Macron démission. Tout cho rapport (rapport à signifie à propos de) à ch’vatcin conte éch covid!

Ch’qué jé n’comprinds point, ch’est qu’o n’veuche (veuche signifie veuille, vient de vouloér) point s’foaire vatciner. Él vatcination conte él variole al o té rindue obligatoére in dix-neu-chint-deux. Éj n’ai point intindu dire éq d’autchuns (d’autchuns signifie certains) , à ch’momint-lò, il euche'té (euche'té signifie eussent, vient de avoér) défilé din chés rues pour djeuler qu’i nin vouloai'té point! Et pi ch’vatcin il o gaingné: in dix-neu-chint-soéxante-dix-neuf, i n’étoait pu obligatoére d’és foaire vatciner conte él variole. Pasqu’él variole al avoait dispèrue.

Él jour éq tout l’mon.ne i sro vatciné conte éch covid, os pourrons don espérer d’éne ête débarraché d’ichi soéxante-dix-sept-ans. Mais ch’n’est point dmain l’veille! Éch n’est point in récompèrant ch’Présidint à Hitler pi in mettant in.ne étoéle gan.ne (gan.ne signifie jaune) édsu sn habit qu’o fro avancher l’affoaire. A n’o mie d’sin! Bien miux, cha permet d’dire éq chetlòs (chetlòs signifie ceux, mot à mot ceux-là) qu’i manifest'te ch’est rien qu’des estrêmisses à mitan dessinsés (dessinsés signifie insensés) . Est bien pratique, népoint (népoint signifie n’est-ce pas) !

Tanq (Tanq à signifie quant à) à ch’gouvernémint, a n’étoait point aisié d’lutter conte él pandémie, i falloait foaire face. Mais l’tort qu’il ont yeu, cho té d’nous mintir, d’aller dire din chés télés «i n’feut point d’bèrboéres (bèrboéres signifie masques) » quanq i n’avoai'té point, et pi «bèrboéres obligatoéres» l’jour qu’i nn ont yeus. Et pi tout à l’avenant… I s’in vont l’poéyer l’jour éd chés votages (votages signifie élections) , pi chés députés étou (étou signifie aussi) . Tout ch’bieu mon.ne-lò i n’érprésinte pu rien ni pu person.ne, biétôt pu li-minme, et pi surtoute point chetlò qu’i sz ont élis. Soin (Soin inter­jection signifiant attention !) à vous, chés élis, vo siége il est éjectabe!

Élections piége à cons, ch’étoait in soéxante-huit, sous ch’grand Chèrles, mais in.nhui (in.nhui signifie aujourd’hui) ch’est tours (tours signifie toujours) d’actualité:
«Si voter changeait quelque chose il y a longtemps que ça serait interdit.»
    Michel Colucci dit Coluche, humoriste (vers 1980)
«Voter, ce n’est jamais que renforcer une des orientations conservatrices du système existant.»
    Alain Badiou, philosophe (2017)

Éch baroumoaite,
pèr éch preume d’ahoute 2021.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 16/08/2021 Tchuin d’ziu du 16/07/2021