tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

CADOREUX (ici cadoreux signifie flic) !

Valentin Gendrot, journaliste infiltré dans la police, risque 15 ans de prison (chés jornals)

Valentin Gendrot, ch’est un jornalisse qu’il est rintré à muche-tin-pot (à muche-tin-pot signifie en cachette) din la police. Il y est resté deux ans pi aprés cho, bin il o écrit un live dsu ch’qu’i prétind avoér vu pi intindu.

Ch’est don un live, un méchant (méchant signifie piètre) live qu’i raque (raque signifie crache, vient de ratcher) édsu la police, un live qu’i szés monte conme des moins-qué-rien, in route à étombir (étombir signifie ici assommer) chés gins, capabes éd s’in prinde à des paures malheureux sans définche. Dusqu’à foaire des feux témoégnages pi intchulper des innochints d’outrage à agint pi d’rébellion.

Ch’est point vrai! Éj pux vous l’garantir, éj nin sais tchéque cose (tchéque cose signifie quelque chose) . Min grand-pére Aurélien il o fini la djerre in dix-neu-chint-dix-huit conme gardien de la paix à Pèris. I n’avoait qu’és pélerine pour és définde conte chés voéyous pi chés chnapans. Chés cadoreux, chés gins i sz appeloai'te chés pélerines roulées!

Bié seur, au bout d’un siéque, tout cho cha s’est raboéni (raboéni signifie amélioré, vient de raboénir) , chés pélerines i sont dévnues des gaz lacrymos, des tasers, des lancheux d’balles éd définche pi des grenades éd désincerclémint, et pi chés gardiens de la paix il ont té rbaptisié in Forches éd l’Orde, mais ch’est du minme pèrel (ch’est du minme pèrel signifie c’est du pareil au même) !

Pour sin meudit live tout plein d’mintiries, ch’est point in prison qu’i feut mette Valentin Gendrot, i feut l’djillotiner. In puss éj croés bien qu’ch’est à cœuse éd li qu’i y o pu d’un Français dsur deux qu’il est pour qu’o rétabliche él pein.ne éd mort. Ch’est un sondage foait pour «le Monde» qu’i llé dit. Ch’est vrai cho, n’y point qu’él djillotine qu’i feut raverdir (raverdir signifie ici ressusciter) , mais l’baignoére à Lafont d’él rue Lauriston pi étou (étou signifie aussi) l’Intchisition, la tchestion, ordinaire pi estraordinaire pi l'diabe sin train…

Pour nin révnir à chés cadoreux, i sont lò pour protéger chés hon.nêtes gins conte chés mawais. I feut bien qu’os vous mettèche (mettèche signifie mettiez, vient de mette) cho din vo cawette (cawette signifie caboche) ! D’eximpe, i sont lò pour protéger Balkani, qu’il est rintré à s’moaison. Cho foait six moés qu’il est sorti d’prison pour raison d’santé, six moés qu'il est in route à foaire ses patchets (foaire ses patchets signifie agoniser) .

Él toute ch’est d’savoér ércon.noaîte éch qué ch’est in.nhui (in.nhui signifie aujourd’hui) qu’un hon.nête gin!

Éch baroumoaite,
pèr éch seize éd sectimbe 2020.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé (un molé veut dire un peu) d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 01/10/2020 Tchuin d’ziu du 01/09/2020