tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

Éch Marister i vient nous ÉCORER (écorer signifie soutenir)

Éch Marister éd Creuse i s’a dessatché (dessatché signifie sorti, vient de dessa­tcher) d’éch camp d’soéle (camp d’soéle signifie cimetière) éd Prouzel adoù qu’i étoait pèrti s’érposer, n’y d’cho in.ne boin.ne vingtain.ne d’énnées [Pierre Duquet est décédé le 31 décembre 1997]. Ch’est pour évnir écorer tous chés raconfinés qu’os sonmes dévnus édpu achteure (achteure signifie maintenant) passé tchinze jours.

Ch’est qu’i n’mantchoait point d’gingin (du gingin c’est de l’ingéniosité) , no Marister. Quoé qu’ch’est-ti qu’i n’o point maginé, in matiére d’art bié seur! Cho n’sroait-ti qu’ses siligraphies. In.ne rude trouvaille qu’il avoait foait lò. Minme éch nom qu'il avoait invintion.né! Chés tout prémiéres i sz o foaites avuc ses éléves éd Creuse, du temps qu’il étoait coére (coére signifie encore) in activité.

I foaisoait cho avuc du sabe éd fonderie; un sabe qu’il o prins, in rfroédissant l’fonte, des couleurs incroéyabes, édpu ch’beige dusqu’à des noérs in passant pèr tous chés bruns qu’os pouvez rincontrer. I ringeoait tout cho pèr couleur din des tchots casiers in bos.

Cmint qu’ch’étoait fabritché qu’os m’direz, in.ne siligraphie? j’m’in vos vous asplitcher. In preume (In preume signifie d’abord) , in puss d’éch fameux sabe, i vous feut jusse in.ne feuille éd papier, un tchot molé (un molé, un tchot molé signifie un peu, un petit peu ) d’papin (du papin c’est une bouillie d’eau et de farine, servait aussi à encoller le papier peint) pi in.ne plaque éd tôle émaillée in blanc; siq os n’avez point d’tôle émaillée, un carrieu (un carrieu c’est une vitre) ordinaire, grand assez pi posé dsu un papier blanc, a fro l’affoaire.

Os avez tout ch’qu’i feut? alorss, allons-y. Os prindez du sabe et pi avuc, dsu vo morcieu d’tôle, os dessinez… éj sais-ti mi? d’eximpe, os dessinez ch’rétoér (rétoér signifie portrait) éd vo belle-mére. Ch’est ménutieux, mais os ons tout l’temps, éne vous épinez (épinez signifie énervez, vient de épi­ner) point, i feut foaire tout cho al douchette (al douchette signifie en douceur) . Quanq os êtes contint d’vous, ou bin minme édvant siq a nin finit point, ch’pu dur il est foait. Soin d’éne point éternuer dsu, sins cho qué timpête édsu vos tchots monts d'sabe!

Ch’pu dur il est foait. Os prindez achteure in.ne feuille éd papier, os l’batigeonnez bien tout pèrtoute avuc du papin pi os ll’applitchez tout duchemint dsu chl’ouvrage qu’o vnez d’foaire. I n’resté pu qu’à soulver vo feuille ménutieusemint pi qu’à l’laissier sétchi­r (sétchir signifie sécher) .

Mais, m’vlò coére in route à passer pèr Boves (passer pèr Boves veut dire, dans l’Amiénois, faire des détours interminables) ! Tout cho pour finir pèr vous dire éq chés écrivures à ch’Marister il ont reugminté. Édpu in.nhui (in.nhui signifie aujoutd’hui) , os trouvarez à l’page d’éch Marister (allez-y lire, acouter chés contes pi rbéyer chés siligraphies !) tous chés texes qu’os avoème lanché (lanché signifie ici placé, vient de lan­cher) din sin CD-audio, hansé (hansé signifie produit, vient de han­ser) pèr chés Diseux in 2001. Chés texes et pi des siligraphies qu’i vont avuc. Cha vous aidero à supporter ch’raconfinemint.

Éch baroumoaite,
pèr éch preume d’avri 2020.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête (pétête signifie peut-être) !
Adé pi vnez nous rvir.

 


Tchuin d’ziu du 16/04/2020 Tchuin d’ziu du 16/03/2020