tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

A vous dit-ti tchéque cose?

A n’est pourtant point si loin, ch’étoait l’dix-huit éd mai. Pour ratriver (ratriver signifie attirer, séduire) chés gins os avoème écrit au dos d’éch carton d’invitation:

Toute il arrive, él tcheue d’no tchien al o bien vnue. Os ons fini pèr nin vnir à bout! Ch’o point té des pu aisié, mais cha y est, est foait.
Os y sonmes à l’tèrte à pron.nes, ch’est point l’momint d’attraper des puches au lache (lache signifie collet, piège) , tandiss qu’os tnez ch’leu pèr ses érelles, éscouez-szés, vnez nous acouter éch vardi (vardi signifie vendredi) dix-huit éd mai, à huit heures d’érmontée (d’érmontée signifie du soir) , à ch’Musée Postal…
Et pi disez-llé don à ch’bochu qu’i s’érdréche, et pi pèrlez-nné à ch’boéteux qu’i mèrche droét, qu’i l’seuche'te (seuche'te signifie sachent, vient de savoér) pi qu’i vienche'te (vienche'te signifie viennent, vient de vnir) étou (étou signifie aussi) !

Os y êtes achteure (achteure signifie maintenant) ? nan? pourtant os avez in.ne tchote indication qu’al doét vous mette él puche à l’érelle, justémint? point un, mais putôt deux rinseignemints pour trouvoér él solution? Éj m’in vos vous mette édsu ch’boin cmin (cmin signifie chemin) : Musée postal, a n’vous dit rien? ch’est lò qu’os ons foait in.ne poaire éd séries (séries signifie soirées) avu nos Diries! In tchelle énnée qu’os allez m’dire?

In preume chés deux premiéres Diries, ch’étoait din ch’cloétre d’él plache Dewailly. Cha nous méne don din les énnées quatré-vingt-dix; lò ch’est ch’vardi 18 mai qu’i vous don.nero l’réponse: os allez mon (mon signifie chez) Gogole: 18 mai 1990, du premier cœup din ch’1000, ch’est un vardi!!! Étoait don nos Diries 1989 qu’os ons présintées pèr un vardi 18 éd mai 1990 à ch’Musée Postal!!!

Mais cmint (cmint signifie comment) qu’a s’foait qu’i nous pèrle éd cho, no paure baroumoaite?

Éne vous épinez (épinez signifie énervez, vient de "épiner) don point conme cho, siq éj vous pèrle éd cho ch’est qu’i y o un rude (rude signifie formidable) événemint qu’i s’prépère: Lafleur i s’in vo atcheuiller (atcheuiller signifie accueillir) Meuberde. Pour t-ête coére (coére signifie encore) pu clair, Chés Cabotans d’Anmiens i s’in vont juer au moés d’juhiet, le mystère de la rue Motte, une enquête du commissaire Meuberde, in.ne pièche d’aprés Doube assassinat din l’rue Motte!

Bié seur, din l’histoére, os ons perdu l’référinche à Édgar Poe, os ons perdu étou un molé (un molé signifie un peu) d’picard piq (piq signifie puisque) chés Cabotans i s’in vont touiller ch’picard et pi ch’français, mais tout d’minme, vingt-sept ans pu tèrd, vlò qu’chés Diseux i rint'te à l’Académie Picarde éd Lafleur, ch’est conme qu’i diroait éd t-ête jué à la Comédie Française! La Gloére avuc in.ne G majuscule, nom des Eus! In.ne gloére qu’al vient un molé d’trop tèrd, quanq i n’resse quasimint pu qu’in.ne poaire éd Diseux, pétête (pétête signifie peut-être) , pour éne ête fiérs!

Du cœup, pour qu’os n’fuchèche (fuchèche signifie soyez, vient de ête) point un rtèrd, qu’os foaisèche (foaisèche signifie fassiez, vient de foaire) vos révisions dvant d’aller vir (vir signifie voir) pi acouter ch’conmissaire Meuberde mon Lafleur, j’y ai passé pu d’él mitan (mitan signifie moitié) d’ém nuit, mais chés Diries 1989 i sont lò. I sont à intinde pi à lire in intier à leu page aditée (aditée signifie habituelle) : Diries 1989 (allez-y, cré bon diu !)

Éch baroumoaite,
pèr éch preume éd juin 2017.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête !
Adé pi vnez nous rvir.

 


Tchuin d’ziu du 16/06/2017 Tchuin d’ziu du 16/05/2017