tb - ÉCH TCHUIN D’ZIU D’ÉCH BAROUMOAITE - bt
les états d’âme du webmestre

a n’s’Orange point!

Maginons un momint… Vous (Vous signifie votre) blanc bon.net (blanc bon.net signifie épouse) al o un téléphon.ne portabe. Bié seur, tchéche (tchéche signifie qui, mot à mot, qui est-ce) qu’i nn’o point? (mi jé nn’ai point, mais né l’disez point, a foait d’pèr trop niacoés (niacoés signifie niquedouille) …) Adon, vlò qu’sin téléphon.ne il o à rvir (avoér à rvir signifie être malade) . Pinsez, un téléphon.ne qu’il o chonq (chonq signifie cinq) ans d’âge, ch’est quasimint l’âge d’éch Mathiu Salé (Mathiu Salé signifie Mathusalem) d’chés téléphon.nes!

I feut l’canger (canger signifie changer) ! L’canger dvant qu’i fuche mort à foait (à foait signifie complètement) , dvant qu’chés photos qu’i n’y o dsu i fuche'té (fuche'té signifie soient, vient de ête) berzillées (berzillées signifie massacrées, vient de berziller) pasqué minme siq il o chonq ans, i foait des photos pi des films. L’canger dvant qu’éch répertoére i fuche aboli (aboli signifie détruit) . L’canger étou (étou signifie aussi) pasqu’il est passé d’mode!

Alorss, quoé qu’ch’est qu’os foaisez? Conme mi (qu’éj n’ai point d’portabe) os n’y con.naissez point grand cose? Él miux ch’est coére (coére signifie encore) qu’vous fenme al voéche (voéche signifie aille, vient de aller) mon (mon signifie chez) Orange pour coésir (coésir signifie choisir) un nouvieu modéle et pi surtoute pour éq chés Orangisses i foaiche'té (foaiche'té signifie fassent, vient de foaire) ch’qu’i feut pour qu’éch qu’i y o din ch’viux téléphon.ne i s’értrouve din ch’nouvieu.

Adon vlò vous fenme pèrtie avuc din sin saclet (saclet signifie petit sac) , sin viux téléphon.ne pi in.ne facture Orange pour qu’i seuche'te (seuche'te signifie sachent, vient de savoér) bien qu’os sonmes des clieints à eux. Toute i dvroait aller conme in.ne lette din la boéte. Pétête (Pétête signifie peut-être) minme conme in.ne lette du temps d’ém jon.nesse; du temps qu’in.ne lette pour Anmiens postée au matin à Anmiens al étoait distribuée l’minme jour, à chonq heures d’érmontée (d’érmontée signifie de l’après-midi) .

A n’s’a point passé conme cho! Arrivée à l’boutique, Gristiane –min blanc-bon.net– al o coési un téléphon.ne, d’él mèrque Sanssoin, él minme mèrque qu’és tablette. Pasqué m’fenme bié seur al o s’tablette, point du chucolat, hein! éd l’Androïd pur jus, coére! I feut vive avuc sin temps, cré nom des Eus! Chti d’édvant d’portabe, ch’étoait un Olympic, du boin, du solide, mais Zeus pi chés diux d’l’Olympe, est un molé (un molé signifie un peu) dépassé!

Vlò don ch’qu’i foait qu’a n’o point té conme os l’souhaitoème. Éch nouvieu téléphon.ne i li falloait in.ne nouvelle cartéssime, vu qu’échlò (échlò signifie celle mot à mot celle-la) d’échl Olympic a n’rintroait point din l’case d’éch Sanssoin. Ch’est lò qu’chés miséres il ont cminché (cminché signifie commencé, vient de cmincher) . Pour in.ne nouvelle cartéssime, Orange i vu'te (vu'te signifie veulent, vient de vouloér) in.ne carte d’idintité. Pour avoér él carte, i feut in.ne carte… O diroait du Raymond Devos… éh bé, montez din l’ambulance!…

I feut in.ne carte est vite dit, mais point n’importe éltchelle (éltchelle signifie laquelle) . Éch controt il est à min nom à mi. I feut in.ne carte d’idintité à min nom, coère miux, in.ne carte d’idintité d’moins d’dix ans! pourquoé point la leune tant qu’il y sont? Bref, a n’s’a point foait, ém fenme al n’avoait point prins m’carte d’idintité… et pi d'tout sin (d'tout sin signifie de toute façon) m’carte d’idintité al date éd mille neu-chint-quatré-vint-sept. Éch portabe Sanssoin il est don resté dsu ch’comptoér mon Orange. Gristiane al est rintrée à nous (nous signifie notre) moaison avuc sin viux Olympic. Ch’étoait l’vingt-troés d’avri, pi in.nhui (in.nhui signifie aujourd’hui) chl’Olympic i mèrche coére. Pourvu qu’a durche (durche signifie dure, vient de durer) !

Mais ch’pu bieu (bieu signifie beau) , ch’est quanq j’ai rchu (rchu signifie reçu, vient de rchuvoér) m’facture éd mon Orange, i n-y avoait neuf chintimes éd rintchér (rintchér signifie augmentation) ! J’érbée (érbée signifie regarde, vient de rbéyer) chés tchotes lettes, él vingt-troés d’avri, j’avoais cangé d’controt! Él vingt-troés d’avri justémint! Acré nom dé Dju! Sans mé nin rinde compte, pi surtoute sans signure, sans carte d’idintité, sans rien dmander, quoé! J’étoais lò conme Joseph! In.ne opération du Saint-Esprit!… Ém fenme a n’avoait point té mon Orange pour érien. Os n’allons point aller vir chés juges pour neuf chintimes d’euro, mais tout d’minme, mon oRange i n’manque'té point d’R.

Éch baroumoaite,
pèr éch seize éd mai 2017.

Rindez-vous à din tchinze jours pour un nouvieu tchuin d’ziu. Conme éd bien, i y éro étou du neu un molé d’tous les côtés... pétête !
Adé pi vnez nous rvir.

 


Tchuin d’ziu du 01/06/2017 Tchuin d’ziu du 01/05/2017