tb - CHÉS TCHUINS D’ZIU D’ÉCH BAROUMOAITE - bt
archives du deuxième semestre 2010

[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

01/07/10

À CHETLÒ QU’IL IMBRONGUE'TÉ L’IMAGE ÉD LA FRANCE

« Le chef de l’État a demandé aux ministres de faire en sorte que les responsables tirent rapidement les conséquences de ce désastre. » (chés jornals)

Ex Libris dit Frédo Phile, qu’i pèrle din un live éd ses tchutromblets avuc des joénes éd quèrante ans…

Drinse sur la Luce (Saint Panchard, priez pour elle) qu’al n’est lò pour person.ne fauque chés Gwadloupéiens…

Diabe Boly, dit Joéyeux Drille, qu’i dépinse 116 000 euros pour és’n aller in Martinique porter in.ne tchote piéchette à chés z-Haïtiens qu’i vien'té d’ête éscoués un rude cœup…

Cliche-Toudy, él Boutinette qu’al est poéyée 9 500 € à rien foaire, in puss dé sn értraite…

Ciché point mi, ch’est un eute, (Blanc conme neiges) avuc ses 12 000 € d’cigares pèrtis in feumée…

Skie-Assis dit Ramédbou qu’al crie à ch’leu pour chés cambes à chés bleus pi qu’al nin prind in.ne coére pu tchér é-rien qu’pour elle…

Sagnac pi Gigna (Estrora pi Amasi), qu’il ont des logemints gratiss pour mette leu famille au rados

Gallas, Maria dit Bachelette : ch’est sin fiu, qu’il est potier d’sin métier pi qu’i s’értrouve à l’tête d’in.ne sinécure…

France-Inter Bourpiff, coére miux Boutefu, condan.né pour injure raciale, alorss qu’i doét s’otchuper d’no z-idintité nation.nale…

Ribéric, Watt éd sin surpitchet, et pi sin blanc bon.net qu’i sont in minme temps à la foére et pi au meulin : li grand moaîte éd chés sous, l’eute à mette au rados in Suisse chés pécaillons d’és patron.ne…

Et pi l’pastorelle : l’eximpe i vient d’in heut, ch’est chl’intraîn.neu, qu’i dit "casse-té paure niacoés" à l’un d’chetlò qu’il érprésinte !!!

Biétôt chés États-générals ? Chés cahiers d’doléances i sont djò badjés à foait !

Diu i rcon.naîtro les sien.nes !!!


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

16/07/10

HERTCHULE, ARVIENS !

Os savez sûremint cmint qu’Hertchule il o nettié chés étchuries d’Augias. D’éch temps-lò, i n-y avoait point d’Karcher©, il o don décatorné chu fleuve Alphée pour li foaire trécoper chés fanmeuses étchuries qu’il étoai'té badjées d’fien à foait. In moins d’in.ne jornée, ch’cœup l’étoait foait, affoaire réglée…

I n-y o six smain.nes éd cho, ch’étoait rapport à chés inhuman.nitaires Israéliens, éj vous dvisoais d’fosse à brin. Éj n’éroais point dû, vu qu’in.nhui, os y sonmes dusqu’à no bouque din l’fosse à brin, et pi qu’cho pue rudemint ! Édvant d’atuire ses voésins, i feut ramon.ner à sin pos d’porte. Et pi conme un ramon i n’y froait point grand cose, jé n’voés qu’Hertchule pour nous dessatcher d’lò.

Pasqué tout d’minme, os m’avouerez qu’cho cminche à t-ête conséquent ! qu’cho cminche à foaire granmint ! tous chés invintions mintoéres, chés carabistouilles invintion.nées, chés mintiries point maginabes !!!

Un minisse éq d’in.ne main i s’otchupe d’éch budjet d’no poéyis et pi d’l’eute i récoue des sous pour sin pèrti, avuc és fenme qu’al gére in Suisse l’in.ne des pu grosses forteunes éd France… O n’croéyez point qu’cho foait un rude merlicœudage d’éspéces ?

Rmèrtchez, il o té à boin.ne école, avuc, pour éll écorer, deux éspécialisses, deux rprins d’justice ; l’in.ne, condan.née à six moés d’prison avuc sursis pour in.ne affoaire éd mèrtchés trutchés, pi l’eute, condan.né à 18 moés d’prison avuc sursis pi 30000 euros d’aminde pour prise illégale d’intérêts. Ch’est conme cho qu’o z-apprind sin métier !

Pi chtilòl éq j’alloais oblier, li qu’i s’prind pour Zola ! I n’est qu’d’és croère ! N’impêque ! Mimile il o dû foaire un rude tchutromblet din sin luiset !!! Pi tout ll’étchipe qu’al cante él minme rindjéne, qu’al érprind l’minme érfrain, tous autant qu’i sont avu chés castroles qu’il ont d’ahotchées à leu tchul !

Quanjou qu’leu sankimpur il abruvero nos éroés ?

Éj sus fiér éd t-ête Picard, éj n’ai janmoais té fiér éd t-ête Français, mais in.nhui j’nin sus t-honteux !


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

01/08/10

PIMPON PIMPON !

Chés gins d’ém premiére fenme il étoai'té nés natifs éd Frévent. Ch’est d’ém belle-mére qu’éj tiens tchéques mots d’picards qu’i n’sont point granmint con.nus pèr ichi din no ptchot poéyis d’Ferriéres. D’eximpe : « crier pâté cœud » ; a s’dit à Frévent d’in.ne fenme qu’al crie durant sn accouchemint, pi du cœup, a pu vouloér dire, à mesure, accoutcher.

I feut rmonter din ch’diction.naire à Furetiére, qu’i date éd seize-chint-quatré-vingt-dix, pour déteuper :
« On dit d’une femme en mal d’enfant qu’elle crie les petits pastéz pour dire qu’elle crie bien haut, qu’elle souffre beaucoup. »
Point ton.nant, piq o s’aperchut, tours din ch’diction.naire à Furetiére un molé pu heut, éq d’éch temps-lò chés apprintis-pâtissiers i cour'te din chés rues d’Pèris in criant « aux petits pastéz chauds ». Os voéyez bien qu’tout cho i vo insen.ne.

Mais ch’est point pour cho qu’éj vous pèrle éd Frévent. Ch’est qu’i m’est rnu din m’chervelle des flépes éd canchon ; in.ne canchon éq j’ainmeroais bien ll’értrouvoér in intier. M’est avis qu’ch’est in.ne sorte éd son.nerie d’clairon foaite pour appeler chés pompiers et pi qu’o z-y o mis des paroles édsu.

filature de Rollepot Achteure, vlò ch’qu’i m’in resse :
« Pompiers d’Rollepot mettez vite sac à dos
« Pour él manœuve d’él pompe éd chés tuyaux
« Os irons boère…
« In.ne pinte à manche et pi un boin tchot pot »

J’ai té vir mon Gogole. Rollepot ch’est un liu-dit d’Frévent, adoù qu’y avoait in.ne filature qu’al o brûlé in dix-huit-chint-soéxante-et-onze. Pèr aprés n-y in o in.ne eute qu’al o té hansée. Achteure o z-y foait des mousses in plastique. Et pi in.nhui, n-y in o-ti coére des pompiers à Rollepot ?


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

16/08/10

UN ÉFANT CHO N’MINT POINT !

J’éroais pu tout d’minme foaire un molé intintion. Des cœups o n’voét point pu loin qu’él bout d’sin nez. Maginez qu’j’euche foait min premier tchuin d’ziu pèr un vingt-neu d’février. Éch baroumoaite il éroait ses âges tous les quatre ans, pi a n’sroait point pu mal pour autant…

Os vous rindez-ti bien compte qu’édpu in.nhui douze énnées, tous les tchinze jours j’ém patrique ém chervelle pour dessatcher un mot d’billet ? Minme qu’a m’est arrivé d’foaire deux foés l’minme ! à tchéques énnées d’écart qu’os direz et pi sins seulemint m’in rinde compte, bié seur, mais tout d’minme…

Mais y o tchéque cose d’asseuré, ch’est qu’éch baroumoaite i n’vous o janmoais minti. Chés éfants i n’mint'té point. Éne dit-on point qu’él vérité a s’dessaque éd leu bouque ? Bé siq os né m’croéyez point, vlò-lò in.ne tchote histoére qu’al vous montréro qu’os vous berlurez.

Soin ! Ch’est lò chés darin.nes frouettes ! éch tiloér à ramintuveries il est à sec ! Aprés ch’tchuin d’ziu-lò, i feut vous attinde à tchéques mintiries… à moins qu’a n’fuche des romion.neries conte éch gouvernémint. Et pi i feut qu’éj diche un grand merci à Zikarsor. Échtilòl, et pi sn étchipe siq i n’existeroai'te point, i feuroait sz’invinter !

Pour nin révnir à mn histoére, ch’étoait point bien longtemps aprés la djerre, min ptchot frére i vnoait d’avoér troés ans, pi os étoème à Ferriéres pour chés vagances. Min pére, li, i deschindoait Anmiens pour ouvrer, à vélo, tous les jours au matin. Ch’est vrai qu’cho deschind pour aller Anmiens, mais soin, au soér quanq i rapassoait, cho montoait ! Pi pour él peu qu’y euche un molé d’vint – quasimint tours des vints d’ouest – ch’est alorss qu’i falloait avoér des boins guérets !

D’éch temps-lò, nos voésins ch’étoait des Pèrisiens qu’i né vnoai'té point d’trop souvint. Il étoai'té vnus pour él Vierge d’ahoute ; d’Pèris dusqu’Anmiens pèr él train, pi in taxi d’Anmiens dusqu’à Ferriéres. Troés jours pèr aprés, il étoai'té rpèrtis, pèr él minme taxi, mais sûremint point pèr él minme train.

Tchéques jours pèr aprés, un bieu matin, o s’a aperchu qu’pèr nuit l’moaison à chés Pèrisiens al avoait té visitée. Pi chés visiteux i n’y avoai'té point té d’main morte. Il étoai'té vnus, probabe, avuc in.ne camion.nette ; él moaison al avoait té quasimint vidiée : pu d’tabe pu d’caïelles, pu d’eurmoére, pu rien !!!

Ch’étoait d’l’ouvrage bien foaite, pi nous eutes, qu’o dormoème tout au côté, os n’avoème rien intindu, os n’nous avoème rindu compte dé rien. Ch’est conme cho qu’él lin.nemain au matin, chés cadoreux il étoai'te lò dsu ch’pos d’él porte à Mantine, él cabèretiére ; il écrivoai'té din leu ptchot canepin, éll intchête al étoait lanchée. Ch’est à ch’momint-lò qu’min ptchot frére, qu’i passoait dvant chés cadoreux tout don.nant l’main à min pére, il o déclatché d’tout sin pu fort :
« Hein, apa ! o sz’intindoait bien, pèr nuit, chés voleux ! »


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

01/09/10

Présidint, os sonmes lò

J’ai rchu din m’boéte à lettes tronique un méchant message qu’i n’m’o point granmint plé. Il étoait in français, éj vous l’ai don értraduit in picard :

« Priez avuc éch pére Arthur pour éq XXX il euche in.ne attaque,
« Pi foaisez suire éch message-lò à chonq gins éd vo canepin d’adréches.
« Tchot Blaise i l’o foait, i vient d’gaingner chonq euros à l’tireloterie.
« Éne berzillez point l’tchaîn.ne,
« Papa Tchutchu il l’o foait, troés jours pèr aprés, il o té aboli d’chés listes à Paul Imploé. »

Présidint, nous eutes, tous chés boins Français, os sonmes lò pour vous écorer ! Pi tous chés mawais qu’i vous traîn.ne'té din chés raques, i feut leu z-inlver leu nation.nalité ! Quanjou qu’ch’est-ti qu’i s’in vont arter ? O n’ons janmoais yeu un présidint conme vous ! Tchéqu’un qu’i s’dépinse sins compter pour qu’os fuchonche heureux. Éj n’arrive point à maginer adoù qu’os nin sroème siq os n’sroète point lò !

Pi vous eutes, tas d’niacoés, pinsez à nos écoles et pi nos univarsités ; i n’ont janmoais yeu sitant d’sous, i n’sai'té minme pu quoé nin foaire. Pinsez à chés hôpitals : des infirmiéres à l’gron.née, qu’i n’sai'té point à quoé leu z-otchuper. Pinsez étou à chés wèrtiers d’banlieue adoù qu’i n-y o tellemint d’cadoreux qu’chés voéyous i n’ont pu assez d’cailleux pour észés peloter !

Jé n’sais point siq os vous rindez compte, mais minme chés gins à l’étringer qu’i nous invie'te d’avoér un sitant boin présidint. Des foés i di'té du mau d’li, mais ch’est tasseulemint pèr jalouseté.

Tant qu’à chés romanos, pour qu’i né rvien'té point nous imporvigner, ch’est point bien complitché, i suffit d’leu tatouer un liméro dsu leus avant-bros… Et pi l’eute lò, Bénoét Seize, i froait bien d’prinde eximpe édsu Pie Douze et pi freumer s’djife… nan mais ! éd quoé qu’jé m’mêle ?


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

16/09/10

MES MIE À MI.

Os ons yeu, n-y o tchéque temps, mi pi Julie, in.ne tchote distchussion édsu chés "mie" in picard. I n’y o point si longtemps qu’cho, mie in français o sé nin servoait coére in plache éd pas o bin point. In.nhui a n’est pu d’usage, à tout l’moins in français. Stapindant chés Picards il ont wardé leu mie, mais soin ! o n’put point l’mette à tous les seuces. Ch’est ch’qu’os nous disoème, mi pi Julie.

Alorss, pèr aprés, éj m’ai dman.né cmint qu’o pourroait détrier tout cho ; du cœup, j’m’ai lanché din in.ne gran.ne tchête. J’ai té tracher tous chés mie qu’o put trouvoér din chés tchuins d’ziux. J’ai szés point comptés, mais o put dire à lurlure qu’i n-y in o pu d’deux chints !

Os allez don juer insen.ne avuc mi pi avuc mie. Ch’est, conme qu’i diroait in.ne éspéce d’intchête lindjuistique ! Vlò lò pèr in dsous, tchéques pinsées bien tornées avuc un mie ndin, ou bin un point pi minme des foés pusieurs. À vo avis, o put-ti écanger l’in.ne pour l’eute ? A s’diroait-ti din vo picard à vous ? Quanq o put l’foaire, a cange-ti d’sin ?

No boin Présidint il o dit « des sous, i n’y in o mie », il éroait pu rajouter « mais pour mi, sié ! »

Un minisse qu’i mint, a n’est mie rien, ch’est quanq i n-y in o pusieurs qu’a vient épinant.

N’y o point d’tchutchute, person.ne i né m’fro freumer m’djife.

Un porté-parole aussi tant niacoés, a n’est mie Diu possibe !

point d’sous, point d’légion d’hon.neur !

Éch trésorier-lò ch’est un point grand cose…

Un présidint pèrel, a n’s’étoait mie janmoais vu.

O n’dit-ti point « és langue al sro usée qu’ses bros i sront coére tout neus ! »

Éch présidint i n’o mie qu’à invoéyer l’Europe au diabe boli

Tous chés promesses qu’il o foaites, i n’y pinse mie pu.

Achteure, pour 2012, i n’o mie pu rien à perde

Foaire éd l’imblée, i n’sait mie foaire éq cho.

Chés ratrouilleries à Mame Rédingue, cho n’li foait mie ni cœud ni froéd

Pour chés rtraites, foaire mèrche arriére, i n’y pinse minme point.

Éch minisse éd l’Idintité Nation.nale il o dit « Ch’est point mi ! Pinsons peu mais pèrlons granmint ! »

O n’sait mie quanq o n’sait point.

Clitchez ichi siq os voulez vir chés mes réponses.


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

01/10/10

CŒUCHMÈR !…

Mais quoé qu’ch’est qu’i pourroait bien foaire éd puss, no paure présidint ? Chés romanos qu’i vien'té minger l’poule au pot din l’gatte éd chés boins Français, i sz o rinvoéyés à leu moaison. Chés riches, grâce à li, i n’ont pu dzoin d’mette leus pécaillons in Suisse, in France i sont au rados. Minme chés paures cons qu’il ont yeu leu pèrt : i s’in vont pouvoér ouvrer puss pour gaingner moins.

Aprés tout cho jé n’comprinds vraimint point : cmint qu’i n’dépasse point vingt-six pour chint éd gins contints d’és person.ne ? Heureusemint qu’i y o à l’intour éd li des minisses qu’il ont du gingin ! Éj pinse à Heurtesson pi à Befeux. Siq i n’étoai'té point lò pour él l-écorer, i n’éroait minme point chés voéx à Marine, éch paure misére !

In.ne boin.ne min.niére dé szés rassen.ner, ch’est d’foaire peur à chés gins. Quanq il ont les freux, i sont pire éq des ptchots éfants, i vien'té leu lancher din ch’gron d’leu pére à tertous. In vrai, ch’o djò cminché, éch plan vigipirate il o té raverdi. Janmoais os n’ons té aussi tant mnachés pèr chés terrorisses. Tours 26 pour chint !

Alorss i feut foaire miux, i feut in.ne alerte à la bombe, i feut foaire évatchuer no Tour Eiffel… Ch’est lò qu’os nin sonmes in.nhui. Tours 26 pour chint !

Du cœup pour la suite o put maginer !…

D’eximpe o pu maginer éq chés caïds d’al Caïda i fuche'té dsu l’point d’foaire esploser in.ne bombe din ch’métro. Chés cadoreux il ont vu vnir, mais i n’bouge'té point. I n-y o tchéques gins d’affolés, un mort pétête minme ? Rien à foaire. Conme a foait pu d’huit ans qu’i s’otchupe éd no sétchurité, o z-est tours à 26 pour chint !

Put qu’mantcher, o pu maginer d’nin rmette in.ne tchuillére à pot : Chés plombiers du Rambo Varior il étoai'te à la rtraite. I rprinde'té du service. Szés vlò à hanser un onze sectimbe à l’seuce d’eux eutes. Cho foait pusieurs miyers d’morts. Pi lò chés jux i sont foaits, rien n’vo pu. Médiapèrt i sé nin mêle, i démuche éch potieu rose édsu chl’intèrnéte. No paure présidint il est tcheu tellemint bos qu’i n’sé rprésinte minme point in 2012 !…


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

16/10/10

ÉCH FOUR ET PI CH’MEULIN

J’éroais bien té manifester, mais quoé qu’ch’est qu’os voulez, o n’put point t-ête à ch’four pi à ch’meulin in minme temps. In.nhui étoait prévu qu’os iroème ramasser des pinmes. Du cœup, i n’sro point tchestion ichi ni d’four ni d’meulin, mais bien putôt éd pinmes à chide.

Éch temps i n’étoait point d’trop bieu ; chés prévisions il étoai'te putôt à l’pleuve. Chés prévisionneux i n’leus ont point trompé granmint. Du matin, os ons coére yeu d’él chance, in.ne rolée d’solé intér deux tahuts ; tout insen.ne, étoait putôt agréabe.

Pèr aprés, éch temps i s’a grimouché. Stapindant, os ons tout d’minme pu picnitcher din l’pâture éd chés Vignettes. Un répilé qu’il o té arté in plein mitan pèr in.ne grinchée du diabe, in.ne wérée qu’al nous o foait rapasser aïte-aïte à no moaison. Os étoème tertous conme des glain.nes fraiques… Mais cho n’o point duré, nous vlò rpèrti…

Bref, intér deux ébroussures, os ons ramassés nos pinmes. Os nn’ons point yeu sitant qu’os éroème voulu, mais os n’ons point té berdouille. Chés pinmes ramassées, ch’n’est point l’toute ! i feut szés rintrer, szés mette au rados. Toute in un mont, al s’in vont leu réchuer et pi leu parer bien conme i feut. D’ichi un moés os arouterons no campaingne éd chide.

Chés bisbilles il ont cminché jusse à ch’momint-lò. Éch compteu d’pinmes, avuc sin peu dsu sin compteur, il appuyoait bien dsu ch’tchot pipion à chaque foés qu’i voéyoait in.ne pinme qu’al passoait dvant sin nez, mais asseuré qu’al passoai'te éd trop vite pour li ; pétête qu’il avoait du brin din ses ziux, à tout l’moins dé l’ieu ?

Tours est-ti qu’chés pinmes in plache, os nous ons rtrouvé avuc quèrante-troés tchilos d’pinmes, suivant ch’SOCPC (Service Officiel éd chés Compteux d’Pinmes à Chide), pi six-chint-quèrante-chonq tchilos, suivant ch’syndicat RPC (chés Ramasseux d’Pinmes à Chide). Vlò adoù qu’os nin sonmes in.nhui. Tchéche qu’il o raison ? Os voérons bien quanq os frons no chide !


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

01/11/10

LÀ-BOS SIQ J’Y SUS…

Quanq octobe il est pour finir
Él Toussaint al vo biétôt vnir !…

Ch’est coére un d’nos boins dictons picards ! Nous eutes os lé savons bien, ch’qu’i doét arrivé, cho arrive ! put qu’mantcher ! ch’est réglé conme du papier à musique !…

Ch’est conme cho qu’chés délédjés CECT (Confédération d’chés Éternels Cotchus du Travail) il ont dit à leus syndiqués : « rintrez din vos niches, os vous avez assez promné conme cho, siq os continuyez, cho s’in vo finir pèr coûter tchér à la Fraaaaaance. Laissez nous foaire, os allons négocier pour vous eutes avuc éch MIDIF (Malheureux Interprindeux Dzireux d’Implir leus Fouillousses) ! Allez, cantez avuc mi in.ne darin.ne foés : “tous insen.ne, tous insen.ne, ouai !…” et pi achteure, rintrez à vo moaison. »

I feut-ti démépriser chés gins pour éne minme point leu don.ner in.ne chance éd leu nn aller leu tête heute. Pi ch’n’est point bien malin nan pu éd foaire s’acumoncheler él rantchœur et pi l’rantchune din l’cawette éd chés ouvriers. Asseuré qu’i leu nin ramintuveront d’ichi in.ne poaire d’énnées.

Pour tirer d’affoaire chetlò qu’i nous méne'te, jé n’voés pu qu’in.ne boin.ne djerre. In.ne djerre conte chés terrorisses ! Pétête qu’o l’avez rmèrtché, mais al est djò cminchée, él djerre-lò. Soin ! à forche éd brasser du vint pi d’foaire des promesses in l’air, soin qu’a n’fuche conme Djillot qu’i crioait à ch’leu ! Alorss, i feut foaire tchéque cose, mèrtcher un grand cœup, un cœup d’deux cœups !

Pour bien, i feuroait qu’chés gins il euche'té vraimint les freux ! Éj sais-ti, mi ? in.ne sorte d’onze sectimbe bien français, siq os voéyez ch’qu’éj vux dire ? D’eximpe, in.ne bombe à ch’premier étage éd no tour Perret ? Quate chonq chints morts, prindons ?

Bien atombé, n-y o tout ch’bieu mon.ne qu’i feut pour foaire cho bien conme i feut, din chés régues éd l’art conme o dit. N’y o qu’à dmander à chetlò qu’il ont seu déroufler chés ordinateurs éd chés jornalisses du Point, du Monde et pi d’Médiapèrt. Chés des gins qu’i n’manque'té point d’gingin pi qu’i sai'té passer inaperchus.

Mèrchez ! Pour vous rmette vo tchœur à l’indroét, allez vir là-bos siq j’y sus (trop tèrd !!! Os pinsez bien qu'in.ne foés Daniel Mermet mis à l'porte, France-Inter il ont foait l'vide din chés archives.)
maj 02/01/2015
et pi acouter don chés pèrties 10/12 et pi 11/12. Cho s’passe pèr nuit, à Grandpuits, él 22 d’octobe. Mi jé nn ai brai.


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

16/11/10

I N’EST QU’DÉ S’CROÈRE !

Ch’o cminché y o djò in.ne cope d’énnées, jé n’sais point siq éj m’in vos pouvoér vous sz érdon.ner din l’orde ; tant piss, éj vos sz’invoéyer fil à mesure qu’i mé rvaront.

D’in.ne, i s’réclame éd Jean Jaurés. Socialisse et pi pacifisse. Pourvu qu’cho dure. Feut-ti vous rafrétchir vo mémoére ? Jaurés l’o té assassiné ; coére émiux, tchéques énnées pèr aprés, ésn assasin l’o té atchitté. O put tours reuver, quoé qu’ch’est qu’os attindez ?…

i n’est qu’dé s’croère Éd deuze, ch’est à ch’tour éd Guy Môtchet d’és foaire récouer ! Guy Môtchet, jon.ne conmunisse éd 17 ans, fusillé pèr chés Allemands. In.nhui, quanq chés lycéens i deschinde'té din chés rues, i dit qu’ch’est pasqu’i sont manipulés ! Feuroait savoér !…

Éd troése, Albert Camus qu’il o failli y avoér droét li étou ! Tracher à mette din s’fouillousse un Nobel éd littérature, ch’est cho qu’i froait jolimint bien din ch'tableau, tout d’minme. Point d’chance, a n’s’est point foait, Camus i n’iro point coutcher à ch’Panthéïon ! I n-y o conme cho des morts qu’i feuroait tuer in.ne deuxienme foés.

Éd quate, ch’est-ti point li qu’il o té démangler ch’mur éd Berlin ?… rien qu’avuc ses ptchotés mains blanques, des mains qu’i n’ont janmoais yeu d’durions ? Un mur qu’i né dvoait tchair qu’éch lin.nemain seulemint ?…

Éd chonq, lò ch’est tout nouvieu !… a vient d’és foaire !… ch’étoait à Colombey-chés-deux-Clotchers !… chu neuf éd novimbe, il o-ti point dit qu’il étoait no djide ? Soin i n-y in o yeu dz eutes édvant li, atchun din sin poéyis, Francisco, Benito pi Adolf ! Pi, i n’o mie pu s’impêtcher d’és récompèrer à ch’Grand Charles ! Chtilòl, éj né l’ainmoais point granmint, o put minme dire éq jé l’abonminoais, mais li, j’né l’ai janmoais déméprisé !…

Michel Audiart i ll’o dit dvant qu’jé l’diche mi-minme :

Chés cons il ose'té toute, ch’est à cho qu’o szés rcon.noaît !


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

01/12/10

LETTE À MONSIEU L’MAIRE ÉD FERRIÉRES

Monsieu l’maire, i feut qu’éj vous raconte émn histoére. Vardi passé, au matin, j’ai té rinveillé su l’cœup d’huit heures du matin pèr du busin in bos d’chez nous. Jé m’sus dit qu’ch’étoait coére chés manchons d’in face qu’i quèrtchoai'té leu camion…

Eh bin nan, quanq jé m’sus lvé pi qu’j’ai rouvert chés contrévints, n-y avoait in.ne pelleteuse in route à démasingler ch’trottoér in grés pa dvant m’grand-porte. Jé m’dessaque et pi jé dman.ne à cht honme qu’il étoait lò avuc sin paletot gan.ne fluo :
« Cmint qu’éj vo foaire pour sortir ém voéture ? »
I n-y o yeu un silinche, et pi l’eute honme, din l’pelleteuse, i m’o répondu :
« Os allons rboucher ch’treu… »
Ch’est don ch’qu’il ont foait. J’ai pu sortir ém carrette et pi j’ai rintré foaire min déjner trantchille. Eux z’eutes, il ont rcminché à creuser…

Un momint pèr aprés, écht honme in gan.ne i m’o dit qu’i falloait qu’éj rouve ém grand-porte pour afin qu’éch plombier i puche rintrer. Ch’étoait rapport à l’tuyeuterie in plomb qu’al alloait dusqu’à ch’compteur d’ieu pi qu’il alloai'té canger pour mette du plastique à l’plache.

Jé n’vous raconte point, monsieu l’maire, combien qu’j’ai té contint quanq éch plombier, sans prévnir person.ne il o copé l’ieu durant qu’j’étoais in route à prinde ém douche. Tours est-ti qu’à in.ne heure éd rélvée, il ont ramné, avu l’pelleteuse, un quèrt éd méte éd sabe qu’il ont lanché din ch’treu. Pèr au dsu, il ont rmis chés grés au léger ; il sz’ont assis avuc éch dos d’éch godet d’él pelleteuse et pi i leus ont rin.nallé, sans rien dire éd puss qu’i n’avoai'té dit in arrivant.

À pèrt qu’a n’étoait ni foait ni à foaire, pi qu’à ch’ premier passage d’ém voéture i n-y avoait djò troés pavés d’décœuchés, jé n’y ai point foait d’trop d’attache. Cho n’est qu’pu tèrd, pèr nuit, qu’j’ai cminché à rpinser à tout cho. À forche éd buser, d’pinser pi d’pourpinser, j’ai fini pèr comprinde quoé qu’ch’est qu’i m’avoait arrivé.

Monsieu l’maire, j’ai té victime d’éch Gang éd chés Tuyeux d’Ieu !… D’abord étoait mèrtché dsu leu camion.nette : G.T. Ieu. Des gins, probabe, qu’i rvinde'té chu plomb au poéds, du plomb qu’i veut puss éq du dor !

In preume éj m’ai dit qu’siq os éroète té au courant, o m’éroèté prévnu l’veille. In deuze, vous qu’os êtes si tant précœution.neux d’l’èrgint d’vo conmune – éq ch’est no sous à nous eutes, tout d’minme –, os n’éroète point foait canger chés tuyeux d’plomb pour du plastique, vu qu’i n’y o point d’dinger qu’éch plomb i nous impoéson.ne. Conme os n’êtes point l’mitan d’in.ne bête, os n’êtes point sans savoér éq no ieu al est tellemint durte qu’éch calcaire i dépose à l’intérieur éd chés tuyeux ; tant et si bien qu’cho foait in.ne couche éd protection qu’al impêque éch plomb d’ête au contact éd l’ieu. Alorss ? chés gins point prévnus ? chl’èrgint pèr chés ferniêtes ? a n’étoait possibe qu’a fuche vous… ch'étoait des attrape-gins !!!

Achteure, éj vous érais prévnu, os foaisez conme os voulez, mais j’sroais d’vous, éj prévaroais tout l’mon.ne pour qué sz’eutes i n’leu foaiche'té point rbinder conme mi G.T. Ieu !


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

16/12/10

HÉ, CHÉS JUGES, ÉVNEZ M’CHIRER MES BOTTES !

Un ripou cha vo, ch’est quanq i n-y in o pusieurs éq ch’est un problinme !

Des cadoreux qu’i s’in prinde'te à un innochint, qu’i ll’atchuse'té d’tous les maux pi qu’in puss i li fout'te és roufe, il ont té condan.nés à aller in prison.

No minisse éd l’Intérieur il o dit qu’étoait disproportion.né ! Déjò qu’ch’est un rprins d’justice, i n’feuroait point qu’i voéche direc éd l’Intérieur pour finir à la Santé !

Feut-ti qu’jé rméche éch code pénal in picard ? seur éq nan, i n’y comprindroait mie rien ! minme in boin français, à mesure

Pour foaire court o put dire :
Chti qu’i critique éch qué chés juges il ont jugé i put avoér dusqu’à 6 moés d’prison et pi 7500 euros d’aminde…

Ch’est ch’qu’i n-y o d’écrit din chl’artique 434-25 (in vidjeur édpu l’preume éd janvier 2002.)

Le fait de chercher à jeter le discrédit, publiquement par actes, paroles, écrits ou images de toute nature, sur un acte ou une décision juridictionnelle, dans des conditions de nature à porter atteinte à l’autorité de la justice ou à son indépendance est puni de six mois d’emprisonnement et de 7500 euros d’amende.

Les dispositions de l’alinéa précédent ne s’appliquent pas aux commentaires techniques ni aux actes, paroles, écrits ou images de toute nature tendant à la réformation, la cassation ou la révision d’une décision.

Lorsque l’infraction est commise par la voie de la presse écrite ou audiovisuelle, les dispositions particulières des lois qui régissent ces matières sont applicables en ce qui concerne la détermination des personnes responsables.

L’action publique se prescrit par trois mois révolus, à compter du jour où l’infraction définie au présent article a été commise, si dans cet intervalle il n’a été fait aucun acte d’instruction ou de poursuite.

Siq i n-y o tchéqu’un qu’i s’sint d’attaque pour értraduire tout cho in boin picard éd pèr ichi, i put l’foaire et pi surtoute mé ll’invoéyer mon d’chés Diseux !!!


[01/07/10] [16/07/10] [01/08/10] [16/08/10] [01/09/10] [16/09/10] [01/10/10] [16/10/10] [01/11/10] [16/11/10] [01/12/10] [16/12/10]

Adé

archives 1er semestre 2011 archives 1er semestre 2010